Pathianni zanah League Cup final Chelsea Vs Man City

English club tana nomawi chawi theih hmasa ber Carabao Cup chu Pathianni zan dar 10:00 hian Chelsea leh Manchester City ten an inchuh dawn. Wembley Stadium-a inkhel tur hi Etihad Stadium-a Maurizio Sarri hote mualphona vangin a boruak tlahniam mah se final a nih miau avangin engpawh thleng thei a ni.

Chelsea hian Etihad Stadium-ah zahna kawn an zawh tawh a, Manchester City thiam zia khawvelin an hmuh phah thung.

February 10-a inkhelah City-in Blues lakah goal ruk ngawt an khung a, Sergio Aguero chuan hattrick siamin, Raheem Sterling-a'n goal hnih a khung ve bakah Ilkay Gundagon-a'n a pet goal bawk.  Inkhelh banah Chelsea ṭantuten mawhpuh tur dang an nei lo a, an manager Maurizio Sarri chu bang turin an duh.

City laka an chak loh hnu lawkah anmahni mual Stamford Bridge-ah Manchester United an hneh lo a, Blues ṭantuten United ṭantute au hla, "Naktukah an ban dawn che" tih chu an zawm ve hial. Amaherawhchu Chelsea hian Europa League-a Malmo an hneh zarah Italian manager Sarri-a'n thawk lakna hun rei lote a nei a, League Nomawi phei chu 'hnara hlit phawi ang' a ni thung ang.

Maurizio Sarri an sawiselna ber chu a 'luhlulna' hi a ni a, Italian manager hian 'Sarri Ball' bakah ngaihtuahna a seng thei ṭhin lo. Chelsea boss hian a khelh dan a thlak duh lo a nih chuan Man City an chungnung nawn turah a ngaih theih ang.

Chutihrualin Chelsea hian Jorginho tel loin Malmo chu Europa League last 32 second leg-ah 3-0 zetin an sawp a, rawlthar duhawm Callum Hudson-Odoi chu khelmualah 'star' a ni a. English rawlthar hian match ruk inkhel bul a ṭanah goal thum khungin vawi thum assist a nei a, Man City laka an mualpho ṭumin squad a chang pha lo.

Chelsea-in United an hneh loh zawh leh City an hmachhawn inkara Malmo laka insiamṭhatna hun an nei hi an vannei a, hnehna an chan miau avangin League Cup final atana inpuahchahna hun ṭha tak a nih bakah Sarri-a'n duhthlan tur a ngah sawt dawn a, Italian manager-in hun mil ang zelin thutlukna a siam dawn em tih chu Pathianni zanah a hriat ang.

Football thlir dan hi kan tehfung ang zelin a dawng ṭhin a, FIFA World Cup-a Spain champion puitu Andres Iniesta-a'n Ballon D'or a dawn loh laiin Croatia pahnihna nih puitu Luka Modric ten an dawn leh nawlh tho avangin thlir dan a zirin che ṭha leh ṭha lo an awm ṭhin.

Chelsea pawh hi Sarri hnuaia che chhe ta viau anga ngai chuan a ngaihtuah ṭhat leh a ngai. Italian manager chuan, "Mi ṭhahnem takin Arsenal hian season ṭha tak an hmang tiin an sawi ka hria. Mahse EFL Cup final an khel dawn lo a, league-ah kan point hmuh zat a inang reng a, Europa League-ah last 16 kan lut ve ve bawk," tiin a sawi a, ṭawmpuitu an tam khawp ang.

Hei bakah hian Sarri hnuaiah Chelsea-in match hmasa 43-ah vawi 28 an chak a (D6 L9), Pep Guardiola-a'n Man City a enkawl ṭantirh match hmasa 43 aiin match khatin an chak tam zawk (W27 D9 L7). Chuvangin Italian manager kaihhruai London club hi club lian elpha lo tur khawpa tlachhia tia sawi a rem lo a, an khelh fuh niah chuan Man City hneh thei an ni a, hei hi a takin Stamford Bridge-ah an lantir tawh a ni.

Manchester City-in inelna paliah beiseina an nei vek a, season liam ta khan Wembley Stadium-ah Arsenal chu inkhel thunun chungin 3-0 in an hneh a, champion lai an ni. Tun season-ah pawh inelna hrang hrangah goal 127 tehmeuh an khung tawh a, Europe club zinga anni aia goal khung tam an awm lo.

Striker chhuanvawr Aguero chuan tun season-ah goal 24 a khung tawh a, Argentine player chet fuh loh ṭum pawh ni se player dang 16 laiin goal an khung tawh a, Chelsea tlarhnung tan ven bik tur hriatthiam a har ang. Pep Guardiola chuan goal ruk em em chu kan beisei lo tiin Chelsea an sawp zawhah a sawi tawh a, Spanish manager hian goal ruk dang hmuh leh a beisei dawn lo a, chak erawh a inbeisei ang.

League Cup-ah hian Man City-in nomawi vawi nga an chawi tawh a, an nomawi kawl lai hi an humhim thei a nih chuan Manchester United, Aston Villa leh Chelsea te khumin nomawi paruk an chawina tur chiah a ni ang. Amaherawhchu League Cup-a champion ngun ber ni tur Liverpool (vawi riat) an khum a ngai dawn a, an champion char char a nih chuan tun bakah season thum dang an la mamawh dawn tihna a ni.

FIFA chuan kum tling lo player dik lo taka lalut Chelsea an chhui chian hnuah a hremna tur an tichhuak a, transfer bazar inhawng leh hmasa ber pahnihah an bazar thei dawn lo. 

London club hi £460,000 chawitir an ni bawk a, Football Association (FA) chuan £390,000 an chawi ve dawn bawk a ni. 

Chelsea hian ni thum chhungin hrem an nihna hi an khinglet thei a, hremna hi kaltlangpui a nih chuan tun nipui bazar bakah nakkum thlasik bazar-ah player an lei thei lo ang. 

Blues hian kum 18 hnuailam player 14 zet chu FIFA dan kalhin an lalut nia puh an ni a, kum thum chhui an nih hnuah hremna hi pek an ni ta a ni. FIFA hian player kum 18 hnuai lam tan ram pawn club-a an khelh dan chungchangah dan khauh tak an nei a, hei hi player naupang zawkte him nana tih a ni.