RFL Plastics MFA Futsal League Saron Veng leh RVL an lawm, Dinthar club an ngui

RFL Plastics MFA Futsal League-ah group A aṭanga quarterfinal lut tur team pali a chiang. Ningani zanah Dinthar club Lawmna FC chuan tling tawh Laipui FC an hneh loh avangin knockout stage an lut zo lo a, Armed Veng South erawh table mawngphaha an awm avangin an relegate.

Electric Veng Indoor Stadium-ah Chanmari Zothan Futsal chuan Bawngkawn FC chu 7-1 in an hneh a, Chanmari hian goal difference neih ṭhat avangin hmahruaitu nih theihna hun ṭha an neih phah. Inkhel pahnihnaah Ramhlun Venglai-in knockout stage khelh beiseina nei turin Ramhlun South FC chu 9-6 in an hneh.

Match thumnaah Laipui FC chuan Lawmna FC chu 7-4 in an hneh a, Laipuitlang hian Chanmari aia goal difference neih ṭhat vangin hmahruaitu an ni. Dinthar club erawh quarterfinal lut turin match hnuhnung ber result an nghah a ngai thung.

Match tawp berah Saron Veng chuan Armed Veng South chu 9 - 4 in an hneh a, point thum vangin Saron Veng hi pathumnaah an awm. Ramhlun Venglai leh Lawmna FC te chuan point 12 ve ve an hmu a, head to head-a ṭha lo zawk Dinthar club panganaah an awm a ṭul phah.

Group A aṭangin Laipui FC, Chanmari Zothan Futsal, Saron Veng leh FC Ramhlun Venglai ten quarterfinal an lut a, nizan khan group B aṭanga knockout stage lut tur a chiang leh bawk ang.