An mualah Arsenal an tho chhuak

Arsenal chuan khualmuala an ngam loh Bate Borisov chu Emirates Stadium-ah 3-0 in an sawp let a, inkhel hmasa nen belhkhawmin Unai Emery naute hian Belarus champion lakah 3-1 a hnehna changin last 16 an inhlanghkai.

Ningani zan inkhel dangah Chelsea chuan Malmo FC 3-0 a hneh nawnin (5-1) an tlang chiang hle a, team ṭha dang Napoli, Inter Milan, Eintracht Frankfurt leh Bayer Leverkusen te an tlang bawk.

Europa League ṭum danga an khelh aia hmain Arsenal leh Bate ten an khel a, zan dar 11:30-ah inkhel an ṭan avangin a tir lamah Emirates Stadium-ah fans an khat nghal lo - inkhelh laklawh laia lut an ṭhahnem hle!

Inkhel ṭan a nih hnuah erawh Arsenal an chefuh nghal, striker Pierre-Emerick Aubameyang-a cross chu Bate defender Zakhar Volkov-a'n minute lina lekah anmahni lamah a ti lut nghal, first leg-ah Gunners hi 1-0 in chak lo mah se, anmahni mual­ah an siphurh an sut hma viau.

Gunners midfielder khel ṭha tak Granit Xhaka-a corner pet ṭha tak chu defender Shkodran Mustafi chuan chawlhlawk hma deuha tauh lutin an hmahruaina a khung, substitute Sokratis Papastathopoulos-a'n Switzerland international Xhaka hnen aṭanga a ball hmuh bawk an goal thum nan a khung.

Arsenal hian inkhel thunun mah se an goal venhim danah an vannei, goal khat chauh an khung laiin Bate midfielder Stanislav Dragun-a tauh luh tur chu goal line aṭangin Stephan Lichtsteiner-a'n a lo dan sak hman a, forward Maksim Skavysh-a'n hnai tak aṭangin hun ṭha nei mah se goal zawnah a pet lo.

Gunners tana Alex Iwobi, Xhaka leh Aubameyang te goal khung loh pawh vanneih ṭum chu ni se lut thei tur an ni, goal thum khunga an tlang hi Gunners tan chanchin ṭha a ni a, clean sheet nei khat takina goal an chhuah lo hi an lawmna tizualtu a ni ngei bawk ang.

Inkhel ṭan hmain Unai Emery-a'n a player Mesut Ozil chu a hma hun ama kutah a awm tiin a sawi a, Germany international hlui hi a duh chuan a chhuak thei a tihna ang deuhthaw a ni.

Mahse, December 26 hnua a vawi hnih nan Ozil hi inkhel bul ṭantu zingah telh niin a khel chhe lo, Real Madrid midfielder hlui hian tharum ngah tawk lo mah se a thiam a la theihnghilh lo a, chep tak kara mahni lam pass fuh thei a nihna chu Bate lakah pawh a lantir nawn fo.

Arsenal manager Emery chuan, "Rim taka thawk turin ka fuih a, vawiin khan ka beisei leh duh ang takin a khel chhuak. Ani hnen aṭang chuan khatianga ṭha kha kan beisei reng a ni," tiin a sawi. Chutihrualin player a siksawi ṭhin avangin Ozil hi a bul ṭantu zingah a tel ziah dawn tihna a nih loh thu a sawi bawk.

Bate hneha an lawm viau laiin Arsenal lawm a kim lo, captain Laurent Koscielny chu hliam vangin minute 56-naah thlak a ngai. France international hlui hi hun rei tak chhung a hliam hnua rawn kir hlim a ni a, nimin thleng kha chuan a dinhmun hi chiang taka puan zar a la ni lo.

Emery chuan, "A keartui kha na a ti a, ruh tliak a awm loh ka beisei. A nihna takah chuan khelh chhunzawm zel pawh kha a inhuam, mahse nakin zel atan a ṭha zawk tur ngaihtuahin kan thlak a ni. Pathianni zana league match kan khelh hunah chuan a inlan thei mai thei," a ti.

Premier League-a pangana ni lai Arsenal hian Pathianni zan dar 7:35-ah league match khel turin Southampton an mikhual zui leh dawn a, an chunga awm Manchester United leh Liverpool te an inhmachhawn ve dawn bawk avangin an tan point thum hmuh a pawimawh zual ang.

Maurizio Sarri-a enkawl Chel­sea-in khualmuala 2-1 a an hneh tawh Malmo chu Stamford Bridge-ah an mikhual ve thung a, Swedish club lakah zahngaihna an lantir chuang lo. Olivier Giroud, Ross Barkley leh Callum Hudson-Odoi te goal hmangin 3-0 in an sawp - Blues goal pathum hi second half-ah vek a lut.

Inkhel dangah Celtic an mual­pho nawn, an mikhualna ramah Valencia 1-0 in an ngam lo a, inkhel pahnih belhkhawmah 3-0 in an tlawm. Spanish club goal neih chhun hi Kevin Gameiro-a'n minute 70-naa a khung a ni.

Celtic Park-ah si hnih faiin tlawm mah se beiseina nung nen Spain an pan. Mahse, minute 37-na lekah Celtic defender Jeremy Toljan chu yellow card vawi hnihna hmuh vangin hnawhchhuah a ni a, Scottish club hi tho chhuak tur an awm ta lo - a kum zawnin Europa League last 32-ah an tla.

Inter Milan tan captain Mauro Icardi awm lo mah se buaina tur a la awm lo. Italian club hian Matisa Vecino, Andrea Ranocchia, Ivan Perisic leh Matteo Politano te goal hmangin Austrian club Rapid Vienna 4-0 in an sawp. Inter inkhel hi captain nihna an hlih sak Icardi chuan a hmunah a en.

Inter manager Luciano Spalletti chuan, "Player inkhel thei lo leh awm lo chanchin sawi hun a ni lo, tunah chuan khelmual chhunga lut ten an theihna zawng zawng hlana an inlan khan min ti lawm, nasa takin hma kan sawn mek zel a ni," tiin a sawi.