Bengaluru-in Goa sawp

Indian Super League-a semifinal lut chiang tawh pahnih Bengaluru leh FC Goa te chu Ningani zan khan an intawng a, Bangalore club hian player 10 nichungin hun tam zawk hmang mah se 3-0 in hnehna an chang. 

Team pahnihin goal an la khung hma, minute 42-na lekah Bengaluru left back Nishu Kumar chu a yellow card pahnih­na a hmuh avangin hnawh­chhuah a ni a, Goan club hi awlsam takin an chak dawn niin a lang. 

Mahse, Bengaluru-in kim loa khel chungin holam taka inkhel thlah liam an tum lo a, Juanan chuan second half ṭan aṭanga minute ngana lekah goal hmahruai a rawn khung. 

Bengaluru hian an la duhtawk mai lo - Udanta Singh leh Miku ten goal an rawn khung ve leh a, player 10 leka khel chungin 3-0 in hnehna an chang a, table chung berah an awm zui. 

Team pahnih hian match khat chiah khelh tur an nei ve ve tawh a, Bengaluru hian table chung bera awmin season an khar chiang tawh - hei hi anmahni umpha thei awmchhun FC Goa-in head-to-head a an ngam loh vang a ni. 

Zanin dar 7:30-ah ISL inkhel pakhat a awm dawn a, a sang pali zinga tel la inbeisei Jamshedpur FC chuan Chennaiyin FC an lenchilh dawn a, Jerry Mawihmingthanga leh Malsawmzuala te khelhna JFC hian hnehna an chang lo a nih chuan semifinal an beiseina a tawp nghal ang. 

Pathianni zan dar 7:30 hian beisei tur nei tawh lo Pune City leh Delhi Dynamos an inhmachhawn ve leh bawk ang.