Simona Halep hnehtu Bencic

Hmeichhe tennis world number 2 Simona Halep chu Belinda Bencic hneh loin Du­bai Championship quarter­final-ah vuak tlak a ni. Romanian nula hian a chak loh hnuah a taksa a chauh thu a sawi chhuak.

Kum 21 mi Bencic hian a match hmasa zawka Aryna Sabalenka nen an inhmachhaawn ṭumin match point vawi ruk ngawt a inchhanhim a, kum 27 mi Halep nen pawh an inkhel tawk hle, set thum an khelh hnuah 4-6, 6-4, 6-2 in a vannei zawkah a ṭang.

A chak loh chhan sawiin Halep chuan, "Ka ke artuiah na ka nei a, zuan a harsat phah. Ka ball vuak a nat tawk loh bakah a fuh hleithei lo, tun hnaiah match ka khelh hnem avangin khelh ṭhat reng a har a ni," a ti a, a hneh loh Bencic chuan hnehna chan phu khawpa a khelh thu a sawi tel bawk.

Australian Open hnu­ah Halep hian ram tan Fed Cup a khelh a, chumi hnuah kar hmasa mai khan Qatar Open final a thleng leh bawk. French Open champion Halep hi a coach Darren Cahill nen nikum tir lama an inṭhen hnuah coach nghet a la nei leh lo.

Inkhel dangah Austra­lian Open finalist Petra Kvitova chuan Slovakia nula Viktoria Kuzmova hnehin semifinal a lut. Seeded pahnihna Kvitova hian 6-4, 6-0 in hnehna a chang a, a match lehpekah chuan Chinese Taipei player Hsieh Su-Wei nen an inhmachhawn leh ang.

Kum 33 mi Su-Wei hian a match hmasa zawkah Grand Slam vawi thum champion tawh Angelique Kerber a hneh tawh bawk a, seeded palina Karolina Pliskova pawh hi darkar khat leh minute 59 chhungin 6-4, 1-6, 7-5 in a hneh.