Lassana Diarra a chawl ta

Chelsea, Arsenal leh Real Madrid tana khel tawh midfielder Lassana Diarra chu a khelh mekna Paris St-Germain nen inhiat­­thiam tawnna in a contract an ti tawp a, kum 33 mi Diarra hian football a chawlhsan thu a tarlang bawk.

France internatio­nal hlui Diarra hian January 2018 khan free transfer-in PSG hi a zawm a, thla 18 daih contract a ziak. Sea­son hmasa khan match 13 khelh sakin nomawi pathum a chawi pui. Mahse, manager thar Thomas Tuchel en­kawlna hnuaiah erawh tun season chhungin vawi li chiah a la inlan.

Instagram hmanga a chawlh thu sawiin Diarra chuan, "Ka boot khai a hun ve ta, football hian engkim min pek avangin ka lawm. Ka thil tih zawng zawng kha a famkim lo tih ka hria, mahse thinlung takin ngilhneihna nena ka tih ṭhin a a ni.

"Football player kan nih laia hun harsa leh hreh­awm ka tawn chang te, hlim leh lawmna ka tawn changa min thlawp tlat ṭhin­te chungah ka lawm. Tunah hian ka inkhelh tawh loh tur thu ka sawi a ni mai a, tih tur dang ka la hmachhawn zel turah erawh theihtawp chhuahin ka bei zui zel ang," tiin a sawi.