Court-in Minerva leh AIFF inbe turin ti

Minerva Punjab chu Real Kashmir nen an inkhelh tur chungchangah court-a an zualko hnuin Delhi High Court chuan AIFF nena an buainaah chuan inbe phawt turin a ti.

Tun hnaia Pulwama-a firfiak chetna avangin Minerva hi Srinagar-a Real Kashmir nena an inkhel tura an zin duh lo a, AIFF chuan Minerva chungchang hi ngaihtuah turin an League Committee chu an hrilh.

League Committee lamin an chungchang an ngaihtuah hmain Minerva hi court-ah an zualko a, mahse court chuan Punjab club hi AIFF thutlukna ngaichang phawt a, chutah an lungawi lo a nih chuan Court-a kal leh turin an ti a ni. 

Minerva neitu Ranjit Bajaj chuan, "Keini leh AIFF hi inrem dang zawng tura tih kan ni a, League Committee thutluknaah hian kan lungawi lo a nih chuan Court hian kan kir leh min remtih sak vek a ni," tiin a sawi. 

Punjab club hi vawiin chawhnu dar 2:00-ah league match khel turin an inlan dawn a, Neroca an mikhual ang. Pathianni chawhnu dar 2:00-ah Real Kashmir an inlan thung ang a, Indian Arrows an lenchilh ang. 

Pathianni tlai dar 5:00-ah Mohun Bagan an inlan dawn a, hmahruaitu Chennai City an len­chilh dawn avangin inkhel hmuhnawm beisei ngam a ni.