Old Trafford-ah Liverpool an lut dawn

Premier League champion inbeisei Liverpool chuan Pathianni zan dar 7:35 hian Old Trafford-ah Manchester United an tlawh dawn. Jurgen Klopp-a hote hian point an hlawh chhuak a nih chuan Manchester City nen khelh zat inangah league hmahruaitu an ni ang.

Ole Gunnar Solsjkaer-a hoten Reds laka point thum an hlawh chhuak lo a nih chuan Champions League khel thei dinhmun aṭangin an chhuak thei thung. Amaherawhchu United tana hei aia pawimawh chu Reds-in nomawi an chawi loh hi a ni a, Solsjkaer chuan, "Sir Alex hi Liverpool lehthal hlut zia a sawi duh a nih phawt chuan lawm takin hun kan pe ang," tiin a sawi a, hemi tur hian ruahmanna siam ni lo mah se thil kal tawh sawi rik a nih avangin inkhel boruak a nung sawt dawn.

Liverpool leh Manchester United a nih tawh chuan inkhel satliah  a ni tawh lo a, an intawn hnuhnung ber ṭum pawh Jose Mourinho-a'n a hna a chan phahna tiin a sawi theih. Anfield-a an inkhelh ṭumin Reds-in inkhel thunun chungin 3-1 in an hneh a, United-in goal thum chauh an chhuah hi an vannei hle. Hemi ṭum hian Paul Pogba chu bench-ah a ṭhu tluan.

Norwegian manager chuan, "Pogba hi a khel tawh dawn. Amah hi ka duh zawng tak a ni a, player ṭha ber zinga mi a ni. World Cup champion tawh a ni a, dressing room-ah team hotu a ni a, khelmualah ball a chang ngam a, a theihna ang taka khelh chhuahtir hi ka tum dan a ni," tiin French midfielder-in inkhel bul a ṭan tur thu a sawi.

Liverpool boss Jurgen Klopp pawh a tumah a chiang hle. German manager chuan, "Result ṭha neih tumin kan khel dawn," tiin a sawi a, he result ṭha hi point thum a ni ngei ang. Reds player zingah defender lai pahnih Dejan Lovren leh Joe Gomez te an khel thei dawn lo a, Virgil van Dijk kawppui tur chungchangah zawhna a awm nghal.

Klopp chuan, "Fabinho hi midfielder a ni a, a position-ah a khel tam ang. United hian tun hnaiah inrintawkna an ngah em em a, Chelsea lakah goal ṭha an khung a, kan fimkhur a ṭul," tiin a sawi. German manager sawi dan hmangah chuan Dutch defender Van Dijk kawppui tur chu Fabinho ni loin Joel Matip a ni thei a, chutirhualin game plan a zirin Fabinho a awm a nih pawhin a mak lo ang.

Reds ṭhatna tak erawh tlarhma a ni a; Mohamed Salah, Sadio Mane leh Roberto Firmino te an theihna ang taka an khel a nih chuan United hian manager atana an hual ruk Solskjaer hi an sit phah thei a, a vawi khat nana Premier League nomawi chawi an tum hi an beisei chauh ni loin an lak theih tak tak an ring ang.