Tu nge keeper ṭha zawk De Gea nge Alisson?

Liverpool-in season liam taa an neih loh goalkeeper ṭha an nei a, July 2018 khan a hunlaia goalkeeper manto ber ni turin kum 26 mi Alisson chu Roma aṭangin pound maktaduai 66.8 in an lalut.

Alisson-a'n Premier League-a bul a ṭan hmain Manchester United goalkeeper David de Gea chuan hming a lo chher fe tawh. Spanish keeper hian kum 20 a nih laiin Atletico Madrid aṭangin United hi a zawm a, pound maktaduai 18.6 man a ni.

De Gea hian English football-ah bul a ṭan fuh nghal lo a, Stoke City player Rory Delap-a long throw te chu a buaina tham a tling. Amaherawhchu an insiamrem hnuah erawh keeper ṭha ber anga chhal a ni a, United goalkeeping coach hlui Eric Steele chuan, "David hi rilru fim leh talbuai ngai lo ber a ni," tiin a fak a, club legend dang Peter Schmeichel leh Edwin van der Sar nen tlarhnung aṭanga danglamna an siam theih thu a sawi bawk.

United keeper hian 2012-13 season khan league nomawi chawiin hemi ṭum hian 11 clean sheets a nei a, save perecentage ration pawh 76% a nei a. Reds keeper Alisson erawhin season khatna lekah United champion ṭuma De Gea record hi a khum nghal. Amaherawhchu season liam ta khan De Gea hian clean sheets vawi 18 zet an nei a, hemi khum tur hian match 14 clean sheet nei tawh Brazilian keeper hian hun a la nei thung. 

Tun laiah chuan inkhelh dan hmang uluk lehzualin an zirchiang a, season liam ta khan De Gea hian goal ngei tura ngaih vawi 14 a dang. Tun season-ah erawh United keeper hian goal ngei tura ngaih vawi 36 hmachhawnin vawi 33 a chhuah.

Alisson erawhin goal tura ngaih hi vawi 20 hi a hmachhawn a, vawi 15 chiah chhuahin United keeper aiin a record a ṭha zawk. English club zinga a tluk loh awmchhun chu Tottenham keeper Hugo Lloris chiah a ni.

Amaherawhchu clean sheet bik chauh chhiar chuan Alisson-a'n hian record a nei ṭha ber a, vawi 26 inlanah vawi 14 clean sheet a nei a, a hnaih bertu chu Man City keeper Ederson (8 clean sheet) niin De Gea hian vawi ruk chauh clean sheet a la nei thung.

Liverpool leh England defender Stephen Warnock chuan, "Liverpool hian nomawi an chawi a nih chuan Alisson hian an lakluh chhan ang takin hna a thawk kan thei ang. De Gea nen tu nge ṭha zawk kan tih chuan tun dinhmunah chuan Alisson hian a la tluk lo," tiin Brazilian keeper chuan tun season-ah record nei ṭha zawk mah se De Gea ṭha a tih zawk.