Harry Kane a dam tawh - Poch

Tottenham manager Mauricio Pochettino chuan Harry Kane a dam tawh thu a sawi a, mahse a striker duhlai hi zanin dar 6:00-a Burnley nen Premier League an khelh hunah a chhawr ngei dawn em tih erawh a sawi chiang duh rih lo.

England captaon Kane hi January 13 khan a hliam a, a tira a lan dan chuan a ke rek hliam vang hian March thla thleng chawl tura ngaih a ni. Mahse, Kane hian tun kar chhung ṭha takin training a zawm tawh a ni.

Spurs manager Poch chuan, "Kane hian inkhelh a duh leh duh loh ka ngaihtuah lem lo, ni 10 liam ta khan i inpeih em tiin zawt ila chuan a inpeih thu min hrilh daih tawh ang," tiin a sawi a, a striker chu ramsa ang maia awm mai mai thei loa thaza leh inkhelh duh a nih thu a sawi.

Tun hnai season li chhunga club top scorer ni thei Kane dam tawh mah se, midfielder Dele Alli erawh a malpui hliam vangin a la inkhel thei rih lo. England international pahnih awm loh karah hian South Korean tlangval Son Heung-min chu team innghahna a ni a, zaninah pawh Son-a pawimawhna a la sang zel ang.