Barca tan De Jong a khel châk tawh

Barcelona-in pound maktaduai 65-a an lakluh Frenkie de Jong chuan Catalan club tana khelh vat a châk tawh thu a sawi. Ajax midfielder hian thlasik transfer lai khan kum nga chhung atan Barca pan remti mah se Dutch club-ah hian season tawp thleng a la khel dawn a ni. 

Netherlands international chuan, "Naupang ka nih lai aṭang tawhin Barca tana khelh hi ka chak tawh a, ka duhthusam club chu he team hi a ni," tiin Spanish champion tana khelh hi a châk tawh hle. 

De Jong chuan Lionel Messi chungchang sawi zuiin, "Ka ngaihdanah chuan Messi hi footballer piang tawh zinga ṭha ber a ni. Hrilhfiah harsa khawpin a thiamna hi a ril a, player complete tak niin a duh apiang a ti thei a ni," a ti. 

Barcelona hian zanin dar 8:45-ah league match khel turin Sevilla an lenchilh dawn a, Nilaini zanah Real Madrid nen Copa del Rey semifinal second leg an khel leh bawk ang. 

Real hian Barca hmachhawn hmain Pathianni zan dar 1:15-ah league match an khel ve leh dawn a, Levante an lenchilh dawn.