Futsal tui tan kawng a inhawng dawn

Futsal Stakeholders Meeting chu nimin khan Aijal Club-ah neih a ni a, All India Football Federation hnuaia futsal consultant Dinesh Nair chuan AIFF-in futsal kalpui zel a tum dan leh ruahmanna an neihte a tarlang.  Association of Indian Football Coaches-a director ni lai Dinesh Nair hian futsal meeting neih zawh a nih hnuah hian Mizorama football coach-te chu seminar a neihpui zui a ni. 

Futsal club aiawh leh fustal lama mi pawimawhte inhmuhkhawmna hunah hian Dinesh Nair chuan AIFF Cup 2019 buatsaih an tum thu sawiin, "State pariat, enkawl tur bik kan thlang chhuak tawh a, state thlanah te hian futsal league kalpui niin mahni league-a champion te ṭheuhin AIFF Cup hi an khel dawn a ni," a ti. 

Dinesh chuan, "Kan hmachhawp hi a hautak a, chutih rual chuan a hlawhtlin ngei theih nan theihtawp kan chhuah dawn avangin kan hmachhawpte hi kan hlen vek theih kan beisei," tiin Vanglaini a hrilh. 

AIFF hian Mizoramah Fustal Coaching Course Level 1 buatsaih an tum bawk a, Asian Football Confederation aṭangin instructor an lokal ang - Futsal Level 1 training tur hian AIFF hnuaia D license neih phawt a ngai thung. 

Mizoram chu India rama State FA hnuaia futsal league kalpui hmasa ber niin state thlan bik pariatah hian a tel a, Mizoram bakah hian Kerala, Goa, Maharashtra, West Bengal, Meghalaya, Jammu & Kashmir leh Karnataka te chu state thlan bik an ni. 

Dinesh Nair chuan India-in futsal national team a la neih loh thu sawiin, "National team din ngei kan tum a, chumi atan chuan kan league neihte hi kan hmang ṭangkai dawn a ni," a ti a, league aṭanga player an thlan ṭhin tur thu a sawi. 

Indian Super League club Mumbai City-a head of development ni bawk Dinesh chuan State FA hriatpuina hnuaia futsal league ni lo, futsal league danga khel player tan hmun a awm loh tur thu sawiin registration fel taka kalpui a nih tur thu a sawi a, AIFF hnuaia football inelna reng rengah an tel ve phal sak an ni dawn lo.