Nepal hnehtu Mizoramin semifinal lut

2nd Dr T. Ao North East International NEC Gold Cup Under 21 Football Championship-ah Mizoram chuan nimin tlai khan Nepal 3     -0 a hnehin semifinal an lut.

Assam-a inelna neihah hian Mizoramin Inrinni khan Nagaland chu 4-1 in an sawp tawh bawk a, Meghalaya nen point 10 ve ve hmuin group B team dangin an umpha thei tawh lo.

Vawiin hian inelna neih chhunzawm tur a ni a, group hmahruaitu tur chu Mizoram leh Tripura bakah Meghalaya leh Manipur te inkhel result-in a hril ang. Tun dinhmunah chuan coach Vanlalpeka hote hi goal difference hmanga hmahruaitu an ni.

Mizoramin an match hnihnaah Meghalaya nen an inhnehtawk avangin Nagaland laka point thum chauh a tawk lo a, goal khung tam a  ngai.

Inkhelh ṭantirh aṭanga che ṭha nghalin minute 10 chhung lekin PC Lalhriatpuia leh Lalremruata ten an khung nghal a, second half-ah PC Lalhriatpuia leh K. Roluahpuia ten khung belh bawkin 4-1 in hnehna an chang.

Mizoram awmna group-ah hian team ruk awm mah se an elpui tak erawh Meghalaya leh Nepal te an ni a, nimin inkhelah hian chak lo se tla thei dinhmunah an ding ang.

Match hmasa pahniha man of the match F. Lalnuntluanga'n minute 42-naah a penalty hlawhchhuah chu goal-ah a chantir a, second half-ah PC Lalhriatpuia chuan Nepal defender handball vanga an penalty hmuh chu goal-ah a chantir leh bawk.

Substitute K. Lalroluahpuia chuan Nepal keeper ball dan per chu injury time minute ruknaah chiang zetin a khung a, Mizoram 3-0 in an chak.

Mizoram manager Peter Lalzawmliana chuan, "Nepal hi foreign team an ni a, an ṭha khawp mai. Goal thum laiin chak mah ila inchhuang tur kan awm lo a, kan keeper Nunga'n ṭha takin vawi thum a dang a, kan vannei tak zet a ni," tiin Vanglaini a hrilh.