Chennai City-in champion an hnaih

I League hmahruaitu Chennai City chuan nizan khan Mohun Bagan 3-1 in an sawp a, anmahni hnaih bertu Real Kashmir aiin point sarih in an sang zawk.

Nehru Stadium, Coimba­tore-a inkhelah Chennai City an chungnung nghal a, Netor Gordillo-a'n hnai tak aṭangin tauh goal lo mah se minute 8-naah halfway line pelh hret aṭangin goal ropui a khung tho.

Spanish midfielder Nestor hian minute 15-naah a hnampui Sandro Rodriguez khung tur a siam sak zui a, minute 23-naah Pedro Manzi-a'n goal thumna khung ve lehin Chennai club tan Spanish player an vul hle.

Kolasib tlangval William Lalnunfela'n minute 37-naah goal khat khung ve mah se inkhel result a danglam phah lo.

Second half ṭantirhah Chennai City defender Mashoor Thangalakath-a chu hnawhchhuah ni a, Bagan keeper Shilton Paul chuan minute 77-naah red card a hmu ve bawk a. Mariners-in an hmelma East Bengal champion theihna kawng an sial sak lo.