Kane telna Spurs an tawlh thlu

Tottenham Hotspur-in an goal khung khawl Harry Kane-a inhliam chhungin Premier League match thum khelin an chak vek a, English striker tel hian Inrinni zan khan Burnley 2-1 in an hneh lo a, champion nomawi an hlat sawt.

Turf Moor-a inkhelah Chris Wood hmangin Burnley-in hma an hruai a, Spurs tan Kane-a'n chhanglet mah se Ashley Barnes-a'n mualneitu tan chakna goal a khung.

Inkhelh ṭan hmain Mauricio Pochettino chuan Harry Kane dam thu a rawn sawi a, England captain hi Son Heung-Min nen tlarhmaah bul an ṭan.

First half-ah goal a luh loh hnuin minute 57-naah Dwight McNeil-a corner pet chu Chris Wood-a'n a tauh lut a, New Zealand forward hian league match hnuhnung pariatah goal ruk a khung.

Replay aṭanga en let erawh chuan Clarets corner hmuhnaah hian Jeff Hendrick chu ball khawih hnuhnung ber a ni a, goal kick zawk tur a ni.

Spurs-in minute 65-naah siphurh an sut a, Kane chuan rang taka Danny Rose throw-in chu la lutin goal-ah a chantir a, keeper che ṭha Tom Heaton pawhin a dang thei lo.

Clarets-in team ṭha zawk Spurs lakah point thum an beisei ngam a; Ashley Westwood, Barnes leh Dwight McNeil te goal khung tur chu Hugo Lloris-a'n dang mah se French keeper a ṭang tluan thei lo. Minute 83-naah Johann Berg Gudmundsson pass chu Barnes-a'n chakna goal khung nan a hmang.

Tottenham boss Mauricio Pochettino chuan an chak loh dan a hrethiam lo a, inkhelh banah referee Mike Dean chu pan nghalin a lungawi loh thu a va fah.

Boruak lum a reh hnuah erawh Argentine manager Poch chuan, "Ka kal thui hret a, ka thiam loh liau liau a ni. Inkhel pawimawh zia kan hrechiang a, kan chak loh avang khan kan hnual ta deuh. Dressing room pan mai ila a dik tur a ni a, ṭul loah ka inhnamhnawih avangin referee chungah pawh ngaihdam ka dil a ṭul ang," tiin a sawi.

An chak loh chhan sawi zuiin Pochettino chuan, "Kan tihsual vanga chak lo kan ni a, chhuanlam tur dang a awm lo a, mawhpuh tur kan nei lo. Goal hmaah khan kha ai khan kan hriam a ṭul a ni," a ti. 

Tottenham hian match 27-ah point 60 an hmu a, an chunga awm Manchester City leh Liverpool an phak lohna chu point nga a ni a. Nizan inkhela Jurgen Klopp-a hoten point an hlawh chhuak a nih chuan an inthlauhna hi a tam belh ang.

Spurs hian squad an neih chhah tawk loh avangin season ṭantirhah champion tura rin zingah an tel lo a, amaherawhchu an point dinhmunin a zir miau avangin nomawi chawi thei zing aṭangin dah bo hleih theih an ni lo. 

Tunah erawh Tottenham-in Clarets lakah point thum an hloh a, chhiarkawp danin champion theihna kawng la inhawng zau mah se North London club hi nomawi chawi tura ringtu an tlem khawp ang.