Rising Player of The Year dawngtu Siami

Asian Hockey Federation chuan season hmasa chhunga player cheṭha zual tan chawimawina an sem a, Mizo tleirawl hockey khel thiam Lalremsiami Hmar chu Rising Player of The Year atan thlan a ni.

Kolasib tleirawl Siami hian nikum khan World Cup-ah India ai a awh a, Asian Games-ah silver medal a lak pui bawk - heng inelna pahnihah hian India player feh chhuak zinga naupang ber a ni. Argentina khawpui Buenos Aires-a neih Youth Olympic-ah khan silver medal an vaw chhuak bawk.

Vanglaini zawhna chhangin Siami chuan, "A mak ka ti, player ṭha tam tak zinga hetiang chawimawina ka dawng ve mai hi ka phu lo takzet. A aia sang zawk thleng turin theihtawp ka chhuah zel ang," tiin a sawi.

Indian defender Harmanpreet Singh chu Player of the Year award hlan a ni a, Asia team zinga World Cup quarterfinal lut phak awmchhun India mipa team chu Best Performance of The Year atan thlan an ni bawk.