Dika leh Chhani ten silver medal la

Senior National Weightlifting Champion-ship neih mekah Mizo tlangval rit chawi chak Lalzuidika (61kg) leh Lalchhanhimi (71kg) ten silver medal an chawi chhuak a, medal beiseina dang Zakhuma erawh snatch bika a chet fuh loh vangin medal a hlawh chhuak zo ta lo.

Inrinni zan khan Vishakapatnam-a inelna neihah Dika hian snatch (112kg), clean & jerk (132kg), total (244kg) chawiin pahnihna dinhmun a luah. Nimin tlai khan Mizo nula Lalchhanhimi chuan 71kg huangah a chawi zui bawk a, Chhani hian total (207kg) a chawi thung.

Mizoram team hi coach Zarzokima (ASI) leh manager Malsawma Khiangte (SYS) te chuan an hruai. Malsawma chuan, "Kan duhthusam ang thleng vek lo mah se silver medal pahnih kan hlawhchhuak hi kan lawm," tiin Vanglaini a hrilh.

Tun hnaiah Mizo weightlifter ten nasa takin hma an sawn zel a, senior national khel lo Jacob Vanlaltluanga chu March 8-15 chhung hian World Youth Championship khel turin Lal Vegas, USA-ah a khal dawn. Jeremy Lalrinnunga pawh April 18-28 chhung hian Asian Senior Championship khel turin China-ah a kal dawn bawk.