Messi 'Lal' Ropuia - dang thei an awm lo

Lionel Messi tih leh football sawi kawp hi a inhmeh tawh em em a, Argentine forward chanchin sawi chuan goal chungchang kan sawi tel dawn a ni nghal tlangpui bawk. 

Inrinni zan khan Messi hian hattrick siamin Barcelona a chhanhim a, a career-a hattrick a siam vawi 50-na a ni - khualmualah Sevilla chu 4-2 in an hneh a, vawi hnih ngawt an hnufual hman chungin Messi hian a team hi a comeback pui leh a ni. 

Barcelona lawmna belhchhah turin tun hnaia sawisel hlawh tak Luis Suarez chuan goal khat a khung ve bawk a, Liverpool striker hian sawiselna a rin dawn apiangin a la chuai lo tih a tarlang leh ṭhin. 

Catalan club hian hnehna an chan leh tak avangin table chung berah an awm chhunzawm zel a, nizan inkhelah Atletico Madrid leh Real Madrid-in hnehna chang pawh ni se Barca dinhmun a danglam phah lo ang. 

Sevilla hian minute 22-na lekah counter attack chhawr ṭangkaiin Jesus Navas hmangin goal hmahruai an khung a, Sevilla khelmuala inlan Barcelona fan-te an hawihai. 

Mahse, Barcelona-in Messi an nei miau a, Sevilla ṭantute hlim authawm pawh a reh fel hmain Argentine forward hian si phurh sutna goal a rawn khung a, Ramon Sanchez-Pizjuan Stadium thawm a reh nghal duk. 

Barcelona-in an si phurh an sut ran dan aṭanga teh chuan Sevilla hian an chhaih kawlh dawn niin a lang hman a, beisei ang erawh a ni lo - minute 42-naah goal a lut leh chauh a, chu pawh Sevilla khung a ni!

Mualneitu team tan Gabriel Mercado chuan yard riat vela hla aṭangin Sevilla hmahruai nawnna goal hi a khung a, goal dang lut loin chawlhlawk hman a ni a, Barca hawtu ten fiamthu an thawh hman. 

Barcelona ropuina leh vanneihna chu mite neih ve loh Lionel Messi an nei hi a ni. Kum 31 mi forward hian kut ruak maia Sevilla khelmual chhuahsan a duh lo a, minute 67-naah an si phurh a rawn sut leh. 

Hun tawp nan minute nga chiah a awm tawh a, inkhel tawp se chuan 2-2 a ni ang a, point an insem ang. Mahse, Messi-a'n point insem a duh lo. Minute 85-naah a goal thumna a khung leh a, Barca-in hma an hruai.

Barca-in an la duhtawk lo cheu a, Messi pawhin goal khung mai a tawkin a hre lo. Hun pek belh minute thumnaah Luis Suarez khung tur a siamsak ve thung a, Uruguayan striker hian a hun ṭha neih chhawrin goal a khung. 

Suarez hian Sevilla laka goal a khung hma hian match nga zet chu a zawnin goal a khung lo a, coach Ernesto Valverde chu a striker chhan turin a ṭawngchhuah a ngai hial - tunah erawh amah sawiseltute khelmualah a chhanglet a, season ṭha lo tak hmang mek nia an sawi chungin tun season-a a goal 17-na a ni!

Match khata goal thum khung hi thil namai a ni lo a, goal 'special' hlir khung chunga hattrick siam phei chu thil namai lo tak a ni - mahse mite tana harsa tak nia lang hi Messi chuan a ti leh mai ṭhin. 

Messi goal khung hmasak ber hi yard 16 vel aṭanga a ke veilam hmanga a volley goal a ni a,  Ivan Rakitic siamsak niin 'goal of the season'-ah thlang pawh ni se a awm lo hran lo ang tih tur khawpa goal mawi bik a ni. 

Barcelona legend goal hnihna pawh hi ball pet thiam bik tan lo chuan hetianga khung ve ngawt hi a awlsam dawn lo tih a lang a, Ousmane Dembele hnen aṭanga a ball hmuh chu a pet kual lut. 

Messi hian a goal thumna chu Sevilla keeper Tomas Vaclik a chip khum leh a, Sevilla laka an inkhel hi 'one-man show' tia sawi ngam a ni. 

World Class striker tia sawi meuhte pawh league season khata goal 20 an khung chuan season ṭha chungchuang tak hmangah ngaih an  ni ṭhin a, February lek a la nichungin Messi hi chuan tun season La Liga-ah goal 25 a khung tling leh der tawh. 

Messi hian heti zat goal khung tur hian match 23 chiah a mamawh a, inelna hrang hrangah match 32 khelin goal 33 a khung tling leh der tawh bawk.

Ballon d'Or chawimawina vawi nga dawng tawh forward hian 2008-09 season aṭang khan season khatah goal 38 aia tlem a la khung ngai lo a, tun season-ah pawh goal 38 hi chu a khung mai dawn niin a lang. 

Argentine forward hian a goal thumna a khung chiah khan a career-a goal 650-a khungna chiah a ni a, Barcelona tan match 669-ah goal 585 a khung a, ram tan match 128-ah goal 65 a khung bawk.