Mbappe-a'n league 50 khung tling ta

Kylian Mbappe chuan French Ligue 1-ah goal 51 a khung tling ta, Paris St-Germain rawlthar duhawm hian nikum December thla khan kum 20 a tling ve chauh a, season hnuhnung 45 chhunga hetiang dinhmun luah thei naupang ber a ni.

[

Inrinni zan inkhelah PSG hian Nimes 3-0 in an sawp, he inkhelah hian Christopher Nkunku-a'n goal hmahruai a khung hnuah foward Mbappe chuan a hnuhnung pahnih a khung. Ligue 1 champion hian match 25 aṭanga point 68 hmuin pahnihna Lille aiin point 17 ngawtin an sang fal; Thomas Tuchel-a naute hian match khatin an khel tlem zawk.

Neymar leh Edinson Cavani te hliam vanga an inlan theih loh lai pawhin Mbappe a awm avangin PSG tan buaina tur a awm rih lo. World Cup-a France champion puitu hian tun season league match 20 a khelh aṭangin goal 22 a khung tling thei a, inelna hrang hrangah match 31 aṭangin goal 27 a nei tawh bawk a ni.

PSG manager Tuchel chuan, "Mbappe ṭhat zia inhrilh nawn a ngai lo, team ṭha taka a khelh avangin hun ṭha a ngah bawk. Goal hnih aia tam kha khung thei tur a ni, tlarhma lama senior player awm loh ṭum pawha an hmunruak a luah khat ṭhin hian min ti lawm hle," tiin a sawi.