Highlanders tana kawng hawntu Chennaiyin

NorthEast United chuan an club chanchina a vawi khat nan Indian Super League semifinal an khel dawn a, Chennaiyin FC hnenah lawmthu sawi an ba tel nghal!

ISL champion lai team hian Inrinni zan khan Jamshedpur FC chu goal awm loin an inhnehtawkpui a, semifinal lut tura hnehna chan ngei ngei ngai JFC-in hnehna an chan zawh loh avangin Highlanders-in a sang pali zingah season an khar dawn. 

NorthEast United hian match khat khelh la hmabak mah se anmahni ang thoa match khat la khel tur Jamshedpur hian an um pha thei tawh lo a, a sang pali zingah hian an tel ta a ni. 

Chennaiyin tan Jeje Lalpekhlua'n goal khungna hun ṭha tak nei mah se Mizo striker hian goal-ah a chantir thei lo.

Laldinliana Renthlei leh Isaac Vanmalsawma te chuan Chennaiyin tan inkhel bul an ṭan bawk a, Isaac hi Emerging Player of the Match-ah thlan niin JFC lamah Jerry Mawihmingthanga hmuh turin a awm bawk. 

Zirtawpni zan khan Mumbai City chuan Modou Sougou hattrick hmangin ATK chu 3-1 in an hneh a, a sang pali zingah an tel chiang - ATK tana Andre Bikey goal khungin awmzia a nei lo. Kolkata club tan hian Ricky Lallawmawma a inlan.

ISL-ah hian Bengaluru leh FC Goa chuan semifinal an lut chiang tawh bawk a, Bengaluru hian a sang berah table an khar dawn chiang tawh - hei hi anmahni hnaih bertu FC Goa laka head-to-head record an neih ṭhat vang a ni a, team dang tan lehpelh theih an ni tawh lo.