Dortmund tan Bayern an hnawk pha

Bayern Munich chuan Inrinni zan khan Hertha Berlin 1-0 in an hneh a, point 51 hmuin hmahruaitu Borussia Dortmund an nihrual. Dortmund hian nizan khan match an nei a, an result a zirin an inkarah point thum a la awm leh thei ang.

German champion Bayern hian hun chanve hma lamin goal an khung thei bik lo, minute 62-naah Javi Martinez chuan midfielder James Rodriguez-a corner pet chu goal awmchhun ni turin a tauh lut.

Hertha Berlin defender Karim Rekik chu Bayern striker Robert Lewandowski laka a chetdan mawi lo vangin hun tawp dawnah hnawhchhuah a ni a, an kim loh hnuah siphurh sut turin an tho chhuak thei tawh lo.

A zawna Bundesliga nomawi vawi ruk chawi tawh Bayern hian season bul an ṭan fuh lo a, pangana dinhmun an luah hman. Hmahruaitu Dortmund nen an inkarah point kua ngawt awm mah se tun hnaiah an insiamṭha a, an league match hnuhnung 11 zinga 10 ngawtah hnehna changin champion an sawi ri ngam leh ta.