Buaina karah Juventus leh Milan

Coronavirus vangin Italy ram an buai a, harsatna hrang hrang thleng mek karah Coppa Italia semifinal second leg chu zanin dar 1:15 hian khelh a ni dawn - Juventus mualah AC Milan an lenglut ang.

Italian club pahnih hi San Siro-ah 1-1 in an inhnehtawk, tun ṭumah chuan chak zawk an awm ngei a ngai dawn; zaninah goal a lut lo a nih chuan Juve zawk hi tlang tur an ni, inkhel hmuhnawm a beisei ngam ang. A chak zawk hi Napoli leh Inter Milan inkhela chak nen nomawi an inchuh dawn.

Hri leng vangin Serie A match khelh hun sawn a awm nual, match ṭhenkhat chu entu nei loa khelh a awm bawk - Europa League thlengin fans awm loin an khel, zaninah hian Allianz Stadium-ah fans an awm thei dawn, mahse an kim dawn lo.

Covid-19 hi Italy hmar lamah a leng nasa zual, Juve khelmualah hian Lombardy, Emilia Romagna, Veneto, Pesaro, Urbino leh Savona huam chhunga mite chu an lut ve thei dawn lo a ni. Thuneitu lam chuan ticket lo nei sa tawhte chu thleng emaw, midang hnena hralh chhawn emaw an phalsak. Italian champion Juventus chuan inkhel en tur zawng zawngte chu hma taka thleng turin an beisei, stadium chhunga lut tur endik an ngaih avangin hun a duh rei dawn.

Italian club zingah chuan Juventus leh AC Milan te hi an lian dun hle, vawi 231 zet an intawng tawh. Old Lady hian vawi 91 hnehna chang tawhin Milan hi ṭum 66 an chak thung, tun hnaiah erawh Turin club an chungnung, an chak loh hnuhnung ber chu 2016 daih tawh kha a ni.

Season riat chhung a zawna Serie A champion thei Juve hi kuminah pawh rinkai an ni a, pahnihna ni mah se hmahruaitu Lazio aiin Maurizio Sarri nauten match khatin an khel tlem zawk. Milan erawh pasarihnaah an 

awm thung.

Player an neih dan leh tun hnai an result thlir chuan Juventus hi rinkai zawk an ni ngei mai. Amaherawhchu, Milan pawh hi club lian hneh turin an ṭha tawk a, chumi tur chuan player pawh an nei - striker Zlatan Ibrahimovic hoa khel tur an nih avangin eng team mah an huphurh a rinawm loh.

Season tir lama inhliam Giorgio Chiellini a rawn kir leh tawh a, an captain rawn kir hi tlarhnung lama buai ve deuh reng Old Lady tan lawmna tur a ni - zaninah pawh a inlan a rinawm.

Italian manager Sarri-a'n midfield a remkhawm fuh hleithei lo a, ball pet thiam Miralem Pjanic chu a hman rim zinga mi a ni. Mahse, Pajnic hi Lyon nen Champions League an khelh ṭumin a hliam a, a dinhmun a chiang lo.

Milan goalkeeper Gianluigi Donnarumma chu Fiorentina nen an inkhelh ṭumin thlak a ngai a, zaninah a inlan a beiseiawm loh. Centre back Leo Duarte chu tun thla chhung an chhawr theih dawn loh bakah midfielder Rade Krunic leh Lucas Biglia te an in hliam bawk - Milan hi an ṭhat theih dan berin an inlan dawn lo tihna a ni.

Kum 35 mi Cristiano Ronaldo-a'n season kal laiah league goal chauh pawh 21 a khung leh der tawh, a kum tam deuh tawh mah se khawvel hmatawng hlauhawm ber zinga mi a la ni reng. Milan-in Ronaldo hi an veng bik lo a nih chuan inkhelh banah an inchhir ang.

Ronaldo hming a lian a, a record enin midang chunga leng a ni. Chutih rualin Ibrahimovic pawh dah hniam ngawt theih a ni lo, Swede striker hian a goal khung thiam a la theihnghilh bik lo, khelmual chhung leh pawnah boruak a nei lian.