Rinkai England an rintlak

Cricket World Cup opening match-ah inelna thlengtu England chuan South Africa chu run 104-in an hneh a, Oval-a inkhelah Ben Stokes leh Jofra Archer te an che ṭha hle.

May 30-a inkhelah hian ṭhumvawrah South Africa chakin vawm hmasak an thlang. England-in bat hmasain run 311 an siam a, wicket riat an hloh. Proteas-in England bowler Archer ngam loin over 39.5-ah thi fai vekin run 2017 chauh an tlin.

England ṭhatna chu batting a ni a, amaherawhchu opener Jonny Bairstow chuan Imran Tahir ngam loin run khat pawh nei loin khelmual a chhuahsan nghal.

Joe Root (51) rawn lutin Jason Roy (54) nen an inthlawp chho a, opener Roy a thihin England hian run 107 an siam tawh a, an dinhmun a ṭha tawh. Captain Eoin Morgan (57) leh Ben Stokes (89) te rawn che ṭhain England player paliin half century an siam.

Kum 27 mi Stokes hian a 'strike rate' ṭha hmangin England dinhmun a tiṭha a, batting awlsamna hmuna an khelh avangin vanduai thei an ni a. Amaherawhchu IPL-a Rajasthan Royals tana khel Stokes che ṭhat zarah England hian run 311 an tlin a, South Africa tan umphak theih ni mah se a awlsam tawh lo.

South Africa-in Quiton de Kock an nei a, opener hi ODI batsmen ranking-ah pangana ni pha a ni. De Kock hian run 68 zet a vaw chhuak a, amaherawhchu player lar dang Hashim Amla leh captain Faf du Plessis te chet ṭhat ṭum a ni lo.

Rassie van der Dussen-a'n run 50 rawn siam ve mah se hetah meuh hi chuan chak theihna kawng a zim tawh a, mualphona hliah khuh chauhah a ngaih theih. South Africa batsman-te chet ṭhat loh chhan ber pakhat chu Jofra Archer a ni.

Kum 24 mi Archer hian 90mph chuanga nain a vawm deuh reng a, Proteas batsman ten hmachhawn harsa an ti hle. English bowler hian run 27 chauh pein wicket thum a la, Hashim Amla helmet pawh vawm perin South Africa opener hi a chawlh lai lawk phah bawk.

Khawvela fielder ṭha ber zinga mi South Africa player Jonty Rhodes hun lai hmu hman an vannei a, tun ṭuma Ben Stokes-a catch ropui lutuk hmutute pawh hmuh ṭha hmu tiin a sawi theih ang.

Proteas batsman Andile Phehlukwayo ball vuak chu Stokes hian man tumin a um a, 65.8 mph-a chak ball kal chu 8ft 8in a sangah a let zawnga zuangin a man a, entu mipui mak tih a hlawh ang bawkin lawm a hlawh. England all-rounder Ben Stokes chuan, "Tun hnai kum hnih thum chhunga kan fielding ṭhat ber ṭum a ni. An run siam tur tam tak kan dan sak," tiin an fielding ṭhat chu an chak chhan pakhat a nih thu a sawi.

South Africa hian Pathianni tlai hian Bangladesh an hmachhawn lehnghal dawn a, chumi zawhah India nen June 5 tlaiah an inkhel ang. England erawhin Thawhṭanni tlai dar 3:00-ah Pakistan an hmachhawn thung ang.