Australian Open a harsa dawn - Prannoy

Indian badminton player HS Prannoy chuan June 4 aṭanga khelh tur Australian Open chu Indian player-te tan a awlsam loh tur thu a sawi a, fiahna lian a nih dawn tih a sawi bawk.

Tun season chhungin Indian shuttler ten beisei angain result an nei ṭha tawk lo. Australian Open hi ranking siam nan a pawimawh a, 2020 Tokyo Olympics inlan thei tur zawnna a ni nghal zel bawk.

Kum 26 mi Prannoy chuan, "Ka match hmasa berah Lin Dan nen kan inkhel nghal dawn, ka tan chuan tun hnai tournament ka khelh zinga a hautak ber a ni ngei ang, Olympic khelh ka duh vangin eng player pawh hmachhawn ni ila hnehna chan ngei ka tum dawn a ni," a ti.

Indian shuttler zingah Saina Nehwal chu Olympic medal la thei hmasa ber niin London 2012-ah khan bronze medal a la. Rio 2016-ah PV Sindhu-i'n final lut mah se gold medal match-ah Carolina Marin a ngam lo - mipa zingah Olympic medal la thei an la awm ve lo.