Bayern dilna hmasa City-in hnawl

Bayern Munich chuan Germany international Leroy Sane lak tumin Manchester City chu pound maktaduai 70.7 (€80m) in an dawr a, English club chuan an hnawl sak. German champion hian veteran player Arjen Robben leh Franck Ribery te an chawlh tak avangin mual sira awm tur an mamawh a, City winger Sane hi thlakna tura duhthusam a ni ang.

Kum 23 mi Sane hian Premier League champion team-ah hian bul a ṭan tam tawk lo a, chutichung chuan Pep Guardiola erawhin chelh a tum hle. FA Cup final-a Watford 6-0 zeta an sawp ṭumin Pep-a chuan, "Contract thar kan zawrh a, cham zel turin kan duh. Chelh duh lo ilang chuan contract kan zawrhna chhan tur a awm lo," tiin an mamawh thu a zep lo.

Chutihrualin Sane hian a khelh phakna tur club ṭha zawm a hreh lo tih erawh a lang. Guardiola chuan, "Season tharah chuan player lut leh chhuak an awm ang. A chhan chu player ṭhenkhat hian khelh tam an duh avangin chhuah an duh. Hun eng emaw chhung chu khelh loh pawh an pawm thei a, amaherawhchu an khelh zat tur hi tumah ka tiam theih loh avangin an hma lam hun tur hi ka chiang vek lo," tiin a sawi a, Sane hi dinhmun chiang lo zinga mi a ni.

Kar liam ta khan Bayern Munich chairman, Karl-Heinz Rummenigge chuan, "Kan tum ang a, a hlawhtling ngei ang tih erawh ka tiam thei lo. Schalke tana a khelh lai khan lak duh tawh mah ila khatih lai lai kha chu kum thum liam tawh kha a ni a, Robben leh Ribéry te ṭhat vanglai tak a ni," tiin a sawi.

Bayern hian kum sarih chhung a zawnin Bundesliga nomawi an chawi tawh a, Germany player ṭha ber ber khelhna hmun tiha sawi ṭhin a nih avangin Man City-in an dal a nih ngawt loh chuan Sane tan Bavarians sawmna hnawl a har ang.