Beiseina, duhna, thawhrimna leh nomawi European champion nih inchuh Liverpool vs Spurs

Madrid khawpuiah, ni thum vel liam ta aṭang khan Liverpool fan-te an inkulh a, Champions League final ur lawkin an zai rual dual dual tawh - boruak a sang dawn tih hai rual a ni lo. 

Zanin dar 12:30-ah football khawvelin a nghahhlelh Champions League final chu khelh a ni dawn ta a, Madrid khawpuia Wanda Metropolitano-ah Liverpool leh Tottenham Hotspur ten champion nih an inchuh dawn. Liverpool-in final an khelh vawi kuana tur a nih laiin Spurs erawh final-a an vawi khat inlanna tur a ni thung a, team pahnihnin nomawi an duhna erawh a danglam lo ang. 

Liverpool boss Jurgen Klopp chuan, "Champions League final-a zawnin kan khel dawn. Mahse, hmabak hautak em em kan nei a, inpeih kan mamawh - kan inpeih reng bawk a ni," a ti a, Spurs hmachhawn turin an inpeih.

Liverpool fan-ten Champions League final khelh hmain chanchin duhawm an hria a, Roberto Firmino a inlan thei dawn - tun season-ah goal 16 a khung tawh. 

Brazilian striker hi Harry Kane te anga goal khung thei tak ni lo mah se team game khel ṭhin a nihna hi a hmingṭhatpui ber a ni a, a dam phawt chuan Mohamed Salah leh Sadio Mane te pawh an hlauhawm belh sawt dawn tihna a ni. 

Klopp hian Naby Keita erawh a chhawr thei dawn lo a, mahse James Milner, Fabinho, Georginio Wijnaldum, Jordan Henderson leh Xherdan Shaqiri te a neih avangin midfield hi chu a mangan lohna lam tak a ni ang. Liverpool player dang zingah inlan thei lo tur an awm lo a, a tawi zawnga sawi chuan Reds hian an ṭhat dan berin Spurs an hmachhawn thei dawn. 

Tottenham striker Harry Kane a dam tawh a, tun season-a goal 24 khung tawh hi en kan a harsa dawn - hei tak hi Mauricio Pochettino lu tihaitu a tling ang. 

Kane awm loh hlanin Spurs hi an buai lo a ni mai lo a, Ajax lakah comeback ropui an lantir thei. Full back pahnih chhawr ṭangkaitu Liverpool laka hnehna chang turin an mamawh lo zawk hial mai thei. Reds full back pahnih Andy Robertson leh Trent Alexander-Arnold te an tlan chhuak nasa a, hei hi Spurs hian Son Heung-min leh Lucas Moura te tlan chakna leh ball thiamna hmangin an ṭhiat thei ang. 

Kane awm lohin Son leh Moura ten zalenna an ngah sawt a, chu chu Spurs chakna zinga chhiar tel loh a harsa. Poch-a'n, "Kane tel loin final kan lut thei a ni," a lo ti zauh tawh a, English striker hi bench-ah a dah a nih pawhin a mak dawn lo. 

Champions League final-ah meuh chuan boruak a danglam ṭhin a, tawnhriat ngah lo player tan theihna ang taka khelhchhuah a harsa ṭhin - hei hi Spurs aia Liverpool chungnunna a ni thei. 

Spurs player zingah Toby Alderweireld chu Champions League final khel tawh awmchhun a ni a, kum 2014 final-ah khan Atletico Madrid tan a inlan ve tawh. Liverpool player erawh season hmasa lawka Champions League final khel kha an ni a, Premier League inumnaah Manchester City nena boruak sang tem zo hlim an ni a, hei hi an chhawr ṭangkai thei. 

Spurs fans tana thu hriat nuam lo ni tel tur chu Liverpool nen tun season-a vawi hnih an intawnah an tlawm ve ve - an mualah 1-2 in an tlawm a, Anfield-ah 2-1 thoin an tlawm bawk.