FA-in Ancelotti hrem dawn

Everton boss Carlo Ancelotti chu Manchester United nen an inkhelh zawha a chet dan avangin FA-in che mawi loah a puh. Italian manager hian referee Chris Kavanagh a pan a, ṭawngkam hman a duhtui loh avangin hnawhchhuah 

a ni.

Ancelotti hian red card vang hian match enkawl kawngah hremna a hmachhawn dawn lo a, pawisa erawh a chawi dawn. Hremna hi Ningani hmaa a pawm a nih chuan £8,000 a chawi ang a, a pawm lo a niha thiam a chang lo zui a nih erawh chuan £12,000 a chawi thei ang.

Everton leh United inkhelah hian injury time-ah David de Gea-a'n Gylfi Sigurdsson-a goal khung tur a dan hnuah a per chu Dominic Calvert-Lewin-a zawnah tla fuhin English forward hian goal-ah pet lehin Harry Maguire-a ke a per hnuah goal-ah a lir lut. 

Everton chakah an inngai a, referee Chris Kavanagh pawhin goal-ah pawm zet mah se VAR a inrawlh. Amaherawhchu offside position-a Sigurdsson a awm avangin goal-ah pawm a ni lo a, 1-1 in inkhel a tawp. Toffees manager Ancelotti erawh goal luh danah Sigurdsson a inrawlh loh avangin goal-a pawm turah ngaiin referee bulah a zualko. Ancelotti chuan aw nem takin referee nen an inbiak thu sawi mah se a chet dan hi FA-in an pawmsak lo.

Tun season aṭangin International Football Association Board-in manager hnena red card pek theih dan hmang ṭan turin thutlukna a siam a, Ancelotti hi Premier League manager zinga red card hmu hmasa ber a ni. Chutihrualin tun hma pawhin manager che mawi lo hi technical area aṭanga chhuahtir ṭhin an ni a, player angin red card erawh an pe tel ngai lo thung.