Serena leh world number 1 an tla

French Open aṭangin vawi thum champion tawh Serena Williams leh world number 1 Naomi Osaka te chu third round paltlang zo loin an tla a, an tan clay court inelna lian a tawp! Champion lai Simona Halep erawhin last 16 a in vaw kai thung.

Inrinni zan inkhelah seeded 10-na Serena hi Sofia Kenin lakah 6-2, 7-5 in a chak lo a, third round inkhel dangah Osaka pawh seeded chang phak lo Katerina Siniakova lakah 6-4, 6-2 in a tlawm - nomawi chawi tura rinkai pahnih, quarterfinal-a inhmachhawn thei ni bawk an tla.

Philippe Chatrier-ah American player Serena-i'n mipui ṭan a hlawh a, Grand Slam nomawi 24-na chawi tura duhsaktu an tam avangin a ball vuak fuh tam zawkah fans lam thawm a ṭha thei hle.

Mahse, American player hian nidang angin a khingpui service a chhuhsak thei lo, break point vawi sarih a hmuh zinga pakhat chiah a chhawr ṭangkai thei - ama service vawi li a hloh thung. Darkar khat leh minute 32 an inkhelh chhungin nghet taka khel tlang thei Kenin a chak.

World number 35 Kenin chuan, "Serena nen kan inkhel a nih chuan point khat lek hmu tur pawhin a suala sual chhuah a ngai, vawiin boruak nen zawng zawng ka ngaihtuah hian hnehna chan hi a hlu takzet," tiin mittui tla chungin a sawi.

American player ropui Serena hian Roland Garros-ah vawi thum hlawhtlinna a chang tawh a, Australian Open (7 titles), Wimbledon (7) leh US Open (6) a vaiin Grand Slam nomawi 23 a chawi tawh - a tluk loh awmchhun chu Margaret Court (24 titles) chiah a ni.

Kum 37 mi Serena-i'n khawvela a 'ber' nih tih theihna hun ṭha nei mah se season hmasa aṭang khan a la hlawhtling thei lo. A kum a tam tawh a, a vanglai angin a dinhmun a hniam hnuah pawh na taka nawr let theihna ang kha a nei ta meuh lo, player langsar lo zawk lakah a tlawm ngun ta hle.

A chak loh dan sawiin Serena chuan, "Kenin khan a khel ṭha em em a, ball kha sir tak takah rawn vaw letin a duhna takah a dah thei emaw tih mai tur a ni. Hun rei tak chhung chu khatianga khel fuh kha ka tawng tawh lo," a ti.

Wimbledon khelh ṭan hmain thla khat vel bak a awm tawh lo, grass court inelna lianah Serena hi champion lai a ni. Mahse, kumina a khelh dan thlir chuan rinkai ber a ni kher lo ang. American nu chuan, "Hun a la tam tawk, rilru thlamuang takin inbuatsaihna ka nei thei ang," a ti.

US Open leh Australian Open nomawi a chawi hnuah French Open a beisei leh a, mahse Japanese nula hian seeded number 1 nichunga Grand Slam a khelh hmasak berah boruak sang a zo lo a tih theih.

World number 1 hian a match hmasa pahnihah set thum khelin hnehna a chang hram, seeded chang phak lo Katerina Siniakova lakah chak tura rinkai ni mah se darkar khat leh minute 17 chhungin a khingpui service a chhuhsak lo a, double faults vawi thum neiin unforced errors vawi 38 zet a nei.

Kum 21 mi Osaka chuan, "Grand Slam dangte nen a boruak a inang lo, ka chungah hian boruak rit tak a awm ang tlata hriatna ka nei. Harsa mah se a boruak nuam ka tiin ka hlim hle, a pawi ber chu ka chak lo a, major title ka ngaihtuah lian lutuk kha a ni," a ti.

Serena leh Osaka an tla a, Paris khawpuia tennis inelna lianah hian hmeichhe singles seeded sang 10 zing aṭangin player pathum chiah an dam tawh - player thar leh Grand Slam la champion ngai lo tan pawh hlawhtlinna kawng a inhawnga ngaih a ni.

Seeded pathumna Halep-i'n rinkai a nih zia lantir nan Lesia Tsurenko 6-2, 6-1 in a hneh. Romanian nula hian Roland Garros-ah match a khelh hnuhnung 17 zinga 16-ah hnehna a chang, clay court hi a inkhelh thiamna hmun a la ni reng.

Third round-a world number 104 Iga Swiatek hmachhawn tur Halep chuan, "Rinkai chak lo an tam a, boruak inlumlet nasa tak kara hnehna ka chang zel thei hi ka vannei hle," a ti. Halep bakah hian seeded pariatna Ashleigh Barty leh 14-na Madison Keys te chu nomawi chawi beiseiawm la dam zinga mi an ni.