Fury aia Pulev hmachhawn tur Joshua

WBA, IBF leh WBO world heavyweight champion Anthony Joshua chuan June 20 khian Kubrat Pulev a hmachhawn dawn a, an inhnekna tur hmun hi Tottenham Hotspur Stadium a ni. 

Joshua hi Deontay Wilder hneh hlim Tyson Fury nen inhnek tur anga sawi thawm a ri ring hman hle. Mahse, Wilder hian Fury a cho nawn avangin Joshua hian Pulev lam a hawi zui ta a ni. IBF danah Pulev hi Joshua hmachhawn tura tih sa a ni hrim hrim a, Bulgarian boxer chuan, "Khawvel hmaa ka theihna pholanna hun ka nei tur hi ka lawm takzet a ni," tiin a sawi. 

Joshua hian September 2018 khan Alexander Povetkin chu Wembley-ah a hneh a, Pulev a hmachhawn tur hi hemi hnua UK-a fight a hmachhawn leh hmasak ber tur a ni dawn. October 2017 khan Pulev leh Joshua hi inhnek tura tih an lo ni tawh a, mahse Bulgarian boxer hi hliam vangin a inhnukdawk. 

Kum 38 mi Pulev hian vawi 29 inhnek a hmachhawn tawhah Wladimir Klitschko a ngam lo tih loh chu tlawm a la nei lo a, November-a unanimous points hmanga Rydell Booker a hneh chu a inhnek hnuhnung ber a ni.

Joshua hian vawi 24 inhnek a hmachhawn tawhah vawi khat tlawm a nei tawh a, June 2019 khan Andy Ruiz Jr. chu rin loh takin a ngam lo. Mahse, December khan Ruiz hi a hneh let a, WBA, IBF leh WBO world heavyweight title a hloh tawh chu a nei let leh a ni.