Jose Antonio Reyes a thi

Arsenal winger hlui Jose Antonio Reyes, hneh loh nei loa Premier League nomawi chawitu zinga mi chu Inrinni khan car chesualah a thi a, kum 35 mi a ni - a thih thu hi Spanish club Sevilla chuan an puang.

Reyes hi an khua Utrera leh Seville inkarah car-in an tlan a, an chetsualnaah hian a cousin Jonathan Reyes pawh a thi. Reyes-a'n Europa League nomawi vawi hnih a chawipui tawh Atletico Madrid chuan, "Atletico chhungkua chu kan lungchhe hle, kan thinlungah hmun a chang reng tawh ang," an ti.

Spain international hlui Reyes hian 2004 January thla khan Arsenal a zawm a, Gunners tan hian inelna hrang hrangah match 110 khelin goal 23 a khung. League leh FA Cup bakah 2006 khan Champions League final a thlen pui bawk.

North London club chuan thuchhuah siamin, "Jose Antonio Reyes chungchang thu thar lungchhiat thlak tak hian minti hrilhhai hle a, kan club chuan a chhungte, a ṭhiante leh a inkhelh puite kan tawrhpui. Jose, thlamuang takin chawl ang che," an ti.

Gunners legend Thierry Henry chuan a teammate hlui thlahna thu sawiin, "Player ropui, teammate ṭha chungchuang leh mihring mihrinna kawngah pawh mi ṭha tak a ni. A chhungte leh ṭhianten he hun harsa tak hi chhel taka an paltlang theih ka duhsak," tiin a sawi.

Arsenal midfielder hlui Cesc Fabregas pawhin a ṭhianṭha tak thlahna thu a chhak chhuak. Cesc chuan, "Professional football khaw-vela ka ṭhian ṭha hmasa, room khata kan chenpui ni bawk. Hlim hmel pui reng thei, footballer ropui leh mi ṭha tak ni bawk a ni.

"England-a Krismas ka hman hmasak ber ṭuma an chhungkuain min lo dawnsawnna kha ka theih-nghilh tawh ngai lo ang, khatih hunlai khan kum 16 mi chauh ka la ni. Kan insawizawi zawh hnua gym-a tennis football match kan khelh ṭhinte kha lung ti lengtu mai an ni dawn, khelmual chhunga kan inpawhna te kha a hlu zual lai chu a ni.

"Ni hnih liam ta mai khan interview ka neih ṭumin i chanchin hi ka sawi chhuak a sin, hetiang thil a thlen dawn vang pawh hi a ni mahna le! Ka theihnghilh tawh ngai dawn lo che a, kan hre reng ang che. Jose Antonio Reyes thlamuang takin chawl ang che, ka hmangaih che, Cesc," tiin thuchhuah a siam.