Ruiz hmaah Anthony Joshua a tlu sawp!

Pathianni zing khan infiamna khawvelin a beisei loh result a hmu a, boxer 'pathau' Andy Ruiz Jr. hmaah boxer sek leh inkhaithli Anthony Joshua a tlu sawp!

New York khawpuia Madison Square Garden-a inhnekah Joshua hi vawi li ngawt a tlu hman a, round sarihna a thlen meuh chuan a ding nawn tawh lo - Ruiz-a'n rinkai zawk Joshua a knockout a, khawvelin champion thar a hmu. 

Ruiz-a'n Joshua kawnghren kawl lai IBF, WBO leh WBA world heavyweight title zawng zawng a chhuhsak nghal a, mak tiin khawvelin a thlir a, Ruiz-a'n heavyweight boxing-a kawl theih zawng zawng deuhthaw a kawl kim ta.

Kum 29 mi Joshua chuan, "Tunah chuan Ruiz hi champion a ni a, mahse ka lo kir leh ang," a ti a, American boxer Ruiz hmachhawn turin lo kir leh ngei a tum. 

American khua leh tui nihna nei, Mexican thisen hrin chhuah Ruiz-a'n, "Mexican boxer, world heavyweight champion hmasa ber ka ni ang," tiin inhnek hmain a sawi a, khawvelin a uksak lo. 

Ruiz hi Joshua duhthlan hmasa ber pawh a ni lo - Jarrell Miller nena inhnek tura tih an ni a, mahse Miller hi a inhliam. Joshua-a'n Ruiz a thlang a, kum 29 mi Ruiz hian kar ruk chiah inbuatsaihna hun a nei. Inhnek hmaa ticket zawrhchhuahah pawh Ruiz thlalak niloin Miller thlalak a la chuang vang a, chutiang taka chawpchilha thlan boxer chu a ni. Chak tura beisei chi a ni lo a, Joshua hmachhawn theih chu a tan chuan inchhuanna tur a ni. 

Press conference-ah pawh Joshua-a'n an inhnek tur chungchang zawhna a dawng lo a, a hma hun chungchang chu zawhna a dawn tam ber a ni - Ruiz nen tual khata lenga ngaih an ni lo. 

Ruiz-a'n a thiamna leh theihna hmangin khawvel a barakhaih a, round tir aṭangin Joshua a ngam nghal a, mipui sing chuang pungkhawm thawm pawh a ring hle -infiamna khawvela an beisei loh thil an hmu dawn em ni? tiin an inzawt. 

Kum 29 mi Joshua-a'n Ruiz a hmachhawn hmain vawi 22 fight a nei a, mi 21 knockout-in a mutthluk tir a, a hneh zinga a knockout loh awmchhun chu Ruiz-a'n a lo ngam loh tawh Joseph Parker a ni. Joshua-a'n inhnek a hmachhawn tawh 22-a a buai ve bera chhal ngam chu boxer uai thla lam tawh leh legend Wladimir Klitschko a hmachhawn kha a ni a, British boxer tana buaina thlen thei an awm ngai meuh lo.

Watford khaw chhuak Joshua chuan, "Fighter ṭha tak hmaah ka tlawm a ni. Engtiang taka thui nge a kal theih dawn tih hmuh a châkawm a, hei hi kan zinkawnga tel vek a ni," a ti. 

Joshua a tlawm a, zawhna tlanglawn ber chu engtikah nge boxer pahnih an inhmachhawn leh ang tih a ni. Joshua  promoter Eddie Hearn chuan, "Joshua hian hrehawm a ti khawp ang. Rematch leh hun tur kan thlir a, a lo kir leh ang," a ti. 

Hearn chuan rematch chu November emaw December-ah a thlen leh tur thu a sawi a, "Joshua hian a ropuina ang nei let leh tur chuan rematch neih hunah a chak ngei a ngai dawn a ni," tiin a sawi. Ruiz hian vawi 33 inhnek a hmachhawnah vawi khat chiah a la tlawm a, kum 1990-a Mike Tyson tukdawltu James 'Buster' Douglas leh 2001-a Lennox Lewis barakhaihtu Hasim Rahman hnungzuiin thil mak a thlentir ve ta. 

Joshua tan erawh a ropuina nei let turin Ruiz a hneh let vat a ngai dawn a, tuna tan chuan Tyson Fury leh WBC champion Deontay Wilder te nen tual khatah an leng ta rih lo.