Liverpool

"Ka ke lehlam ka pen hian Europe khawmualpui chu a nghing a ni," tiin France mi hrat khawkheng Napoléon Bonaparte chuan a lo sawi tawh a, mahse hetih hunlai hian tharum, silai, hriam leh sipai tha chakna chu hmanrua a ni. 

Khawvelin tharum thawha inrikrapna nena hmun inchhuh-sak a bansan a, infiamna khawvel chu khawvelin Lal ram a lak dan a lo ni ta. Liverpool-in an ke lehlam an pen a, Europe a nghing!

Inrinni zan khan Champions League final-ah Liverpool hian 2-0 in Tottenham Hotspur an hneh a, Europe-ah Merseyside club aia football thiam zawk an awm lo - an Lal ram an zauh zel e. Liverpool tan Mohamed Salah chuan minute hnihna lekah penalty hmangin goal hmahruai a khung a, minute 87-naa Divock Origi-a'n goal a khung leh meuh chuan Spurs beiseina zawng zawng a thamral tawh. 

Season hmasa Champions League final-ah Liverpool-in Real Madrid an hmachhawn a, minute 31-na lekah Reds innghahna Salah chu inhliam vangin lakchhuah a ni - stadium boruak a danglam nghal a, Liverpool fans thinlung hrilhfiahna awlsam ber chu Salah mittui chu a ni. 

Madrid khawpuiah erawh thawnthu a danglam ta. Minute hnihna lekah Spurs midfielder Moussa Sissoko chuan Sadio Mane pet tur a kutin a dang per a, penalty a chawi. Penalty pet turin Salah a lo pen chhuak a, Egyptian forward hian tun season-a a goal 27-na ni turin keeper Hugo Lloris a bum. Liverpool fans an sapatal a, Spurs fans an hawihai thung. 

Liverpool-in goal an khung hma a, Spurs chu nawr let vat tura beisei an ni. Mahse, London club-in final boruak sang an zo lo a, beisei angin Reds an nawr hleithei lo. 

Second half-ah Spurs an nung sawt a, ball an chang tam a, goal khung tumin Liverpool an nawr. Mahse, season hmasa final nena Liverpool danglamna dang a la awm a, chu chu Alisson a ni. 

Pound maktaduai 67 man goalkeeper pasang hi Reds tan si ban inkarah a ding khawng tlat a, a hmaa ding Virgil van Dijk lah nghet taka ban phun ang maiin a rinawm si - Spurs tan a harsa. Season hmasaa Liverpool goalkeeper Lloris Karius-a'n an khingpui Real Madrid chu goal hnih ngawt a 'khilai' laiin Alisson erawh Spurs boruak nung tur vaw daitu a ni a, Son Heung-min, Lucas Moura leh Christian Eriksen te shot ṭha tak a dan sak. 

Hun tawp nan minute thum chauh a awm tawh a, Spurs beiseina vuak chhiat sak an ni. Barcelona laka comeback ropui an lantir ṭuma goal hnih khungtu  Divock Origi chuan Liverpool tan goal a rawn khung a, champion tur a 

chiang nghal.

Spurs manager Mauricio Pochettino-a'n Liverpool laka an tihsual a thlir dawn a nih chuan amah a inenlet hmasak ber a ngai - bench-a Harry Kane dah turin a huaisen tawk lo. 

English striker hi hliam vanga April hnua la inlan leh lo a ni a, Madrid khawpuia inlan hman turin a dam thung. Mahse, Kane awm loh laiin Son leh Moura-ten nuam an chen a, final-ah Spurs an hruai thleng. Poch tana thutlukna dik tur nia ngaih chu bench-a huaisen taka Kane dah a, duh ang thala tal tura Son leh Moura zalenna pek a nih laiin Kane hi bul a ṭan tir a, match fitness nei lo striker hian ṭum dang a phak lo. 

Hriatreng tur erawh Pochettino hi kum 47 mi chauh a la ni a, transfer bazar hnuhnung pahnihah bazar miah loin a team hi Champions League final a hruai thleng. Argentine manager hnathawh hi a ropui em avangin London club tan chelh reng a harsa ang.