A vawi khat nan Petrucci a chak

Danilo Petrucci chuan MotoGP huangah a vawi khat nan hnehna a chang ve ta. Italian rider hi anmahni rama inelna Italian Grand Prix-ah hnehna a chan vang leh, world champion Marc Marquez hmaa a thlen avangin pakhatna nih hi atan a hlu zual bik ngei ang.

Pathiannia tlan zawh tak Italian Grand Prix-ah Marquez-a'n lap hnuhnung ber an tlan tir lamah hma a hruai a, Honda rider hian ropui takin hnehna a chang leh tura ngaih ni mah se khawtual tlangval Petrucci-a'n tlan pel lehin, 0.043sec chauha hmasa zawk nichungin ropui takin hnehna a chang a ni.

Kum 28 mi Petrucci chuan, "Ka khua, ka chenna hmunah ngei min hmangaihtute hmaah hnehna ka chang thei hi a hlu, ka lawmna hi thua sawifiah thiam mai chi a ni lo, awmdan pawh ka thiam lo zawk hial," tiin a sawi. Italian tlangval hi tun hnai season hnih chhung chu pariatna nichungin kum tawp a khar ṭhin, kuminah pawh rider beisei awm berte zinga mi niin world championship table-ah pawh palina a ni mek.

Tun season intlansiak an hmachhawn tawh vawi ruk zinga vawi thum hnehna chang thei Marquez-a'n tun ṭumah ropuina chang lo mah se, hmahruaitu a nihna chu a chhawm nung zel - point 115 nei tawhin amah hnaih bertu Andrea Dovizioso chuan (103 points) a nei thung.

World champion ni lai Marquez chuan, "A hmasa ber aṭangin bul ka ṭan a, hnehna chang turin ka dinhmun a ṭha tih pawh ka hria. Mahse, ka elpui ten min um na em em a, lap hnuhnung ber kan tlan laia min nawr nat dan ka ngaihtuah khan tun ṭum chu ka tan hun ṭha a ni lo tih ka hre thei.

"Point hmu loa chetsual ka hlau a, kan thawhrim tawhna holam taka luan raltir ngawt ai chuan mahni inveng tak chunga point 20 hmuh belh mai kha ka duh ta zawk a ni," tiin pahnihna nih chu a lungawi thu a sawi. Italy-a intlansiakah hian Valentino Rossi chu a tlan tluan thei lo a, point a hmuh belh loh avangin championship lamah pawh hma a sawn lo. Yamaha rider hian point 72 neiin pangana a ni a, hmahruaitu Marquez nen an inkarah point 43 zet a awm tawh avangin nomawi chawi a harsa tawh ang.