Raptors lakah ropui takin Warriors tho chhuak

NBA Finals game 1-a an chak loh hnuah Golden State Warriors forward Draymond Green-a'n "Tun aia ṭha zawkin kan khel thei," a ti a, nimin zinga game 2 an khelh hmain huaisen takin khualmualah ṭha taka an khelh tur thu a sawi leh bawk a, a sawi dik. GSW hian 109-104 in Toronto Raptors an hneh let.

Team pahnih hi best of seven series-ah 1-1 in an inhnehtawk mek. June 6, Ningani zing dar 6:30-ah game 3 khelh a ni dawn, an inkhelhna tur hi Warriors hmunpui Oracle Arena, Oakland a nih avangin Steve Kerr-a nauten chak nawn turin beiseina an nei sang ang.

Game 1-ah Toronto Raptors lamin 118-109 in hnehna an chang a, an khelmual hmanthiam Scotiabank Arena, Toronto-ah game 2 pawh bul an ṭan fuh hle - chawlhlawk laiin 54-59 in hma an hruai thei a ni.

Raptors lamin inkhel an thunun hneh hle, GSW star Stephen Curry leh Klay Thompson ten point nei zauh zauh reng chungin nidang an phak lo. Star player Kevin Durant chu hruai ve mah se a la inlan thei lo a, NBA champion hi a zawna chak lo thei an nih avangin an dinhmun a him lo.

Game 1 roreltu Pascal Siakam-a'n tharum a hmang leh nasa a, minute 39 chhunga point 34 nei theitu Kawhi Leonard chu a hmuhnawmin a pawimawh hunah tak point a neih theih avangin an boruak pawh a ṭha, mahse teammate lam aṭangin thlawpna an dawng ṭha tawk lo.

NBA champion Golden State tan Curry-a'n dinhmun hnuaihnunga an din laiin beiseina a siam, point 12 zetin an hnufual hman. Mahse, Curry hian quarter hnihna zawh dawnah a zawna 3-points vawm lutin an inkar zau lutuk tur a ti zim a, point nga a hniam zawk chungin chawlhlawk an hmang.

GSW coach Steve Kerr-a'n half time laia a naute hnena a thu sawi chu a takin a lang chhuak - second half tir lamah 18-0 ngawta kal falin Raptors an tlanpel a, a tawp thlengin an hawi kir tawh lo. Point 25 neitu Thomson chu quarter hnuhnung ber an khelh laiin 3-point neih tuma a shot chu a tla sual a, malpui hliam vangin a khel zui thei lo.

Most Valuable Player vawi hnih ni tawh Curry-a'n point 23 neiin a langsar a, hnehna an chan theih nana an thahrui pawimawh erawh inkhel boruak sanga buai ve ngai lo Green a ni. American forward hian minute 41 chhungin point 17 a nei, rebound vawi 10 lain assist vawi kua a nei bawk - Warriors tan thlamuanpui tham a ni.

Warriors guard Stephen Curry chuan, "Player tin kan thawkrim a, a bik takin keimahni basket venhim kawngah kan ṭanrual em avanga hnehna chang thei kan ni. Time out a tam a, ngaihdan hran a tam hian kalphung a buai ṭhin, keini erawh chuan coach ṭha tak kan nei," tiin an coach Steve Kerr thutlukna an ṭhatpui thu a sawi.

Raptors coach Nick Nurse chuan, "Inkhel hi ngun takin ka en let dawn, kan chak lohna lai zawnchhuah a ngai. Kan chak loh avangin hrehawm kan ti, mahse ka nauten basketball hmuhnawm taka an khel lai thlir hi chu a nuamin ka lo hlim ṭhin," tiin 1995 hnua NBA Finals an khelh hmasak ber chu nuam a ti hle.

May 31, Zirtawpni

Game 1: Golden State Warriors 109 - 118 Toronto Raptors

June 3, Thawhṭanni

Game 2: Golden State Warriors 109 - 104 Toronto Raptors

(Team pahnihte series-ah 1-1 in an inhnehtawk mek)

June 6, Ningani

Game 3: Toronto Raptors 06:30 AM Golden State Warriors

June 8, Inrinni

Game 4: Toronto Raptors 06:30 AM Golden State Warriors

June 11, Thawhlehni

Game 5: Golden State Warriors 06:30 AM Toronto Raptors

June 14, Zirtawpni

Game 6: Toronto Raptors 06:30 AM Golden State Warriors

June 17, Thawhṭanni

Game 7: Golden State Warriors     05:30 AM Toronto Raptors