Thla li atan Sturridge an hrem

Liverpool striker hlui Daniel Sturridge chu sum inthapna lamah a lo inhman avangin June 18 thleng inkhel thei lo tura hrem a ni a, English striker tan season a tawp tihna a ni.

 

Turkish club Trabzonspor tana khel mek striker hian a club khelhnaa a contract pawh inhriatthiam tawnnain a ti tawp nghal a, "Hnathawk lo chunga hlawh lak ka duh lo a ni," a ti. Kum 30 mi striker hian January 2018 khan a unaupa chu a club zawm tur chungchanga sum thap turin a ti a, Sevilla a pan tur thu a hrilh. 

Football Association chuan hei hi hre chhuakin thubuai 11 zet an siamsak. Regulatory Commission chuan chhui zuiin thubuai pakua an paihsak a, July 2019 khan  £75,000 (Nuai 70.11) chawi tur leh kar hnih inkhel thei lo turin an lo hrem tawh. 

Hremna ang tak chuan kar ruk chhung atan hrem a ni a, mahse kar li hi August 2020 thleng 'suspend' niin hemi hun chhunga sum inthapna lamah a in hmang lo a nih chuan kar hnih chauh hi a tawrh tura tih a ni. 

Regulatory Commission thutluknaah FA an lungawi lo a, thubuai hi ngaihtuah ṭhat turin an thlen. Thubuai hi ngaihtuah nawn a nih hnuah English striker sum chawi tur hi £150,000-ah (Nuai 140.27) tihsan a ni a, thla li atan hrem a ni ta bawk. 

Sturridge chuan, "Profes-sional footballer-ten hlauhna nei miah loa an chhungte bula zalen taka an titi theih nan theihtawp ka chhuah dawn a ni," a ti a, a chunga hremna lek kawh tawh sa tih pun a ni chu pawi a tih thu a sawi. 

English striker beiseiawm ni ṭhin, hliam vanga a nih tur ang ni phak ta lo Sturridge hian nipui lai khan Liverpool-a a contract hmang zoin Turkey a pan. Trabzonspor tan hian kum thum atan contract a ziak a, mahse season khat pawh a khelh hmain tihtawp a ni ta - match 16-a khelhsakah goal sarih a khung thei a ni.