Lianzuala telna India-in Thailand thleng

Football Association of Thailand buatsaih King's Cup khel turin India chuan nimin khan Buiram an thleng a, player 23 zin chhuak zingah Mizo winger Lallianzuala Chhangte a tel. 

Coach thar Igor Stimac hnuaia khel tur India hian a tirah player 37 an ko a, May 21 aṭang khan Delhi khawpuiah camp neiin player 23 an thlang chhuak leh a, thlan zingah Lianzuala hi a tel a ni. Player a nih laia Croatia tana World Cup-a pathumna dinhmun lo luah tawh Stimac-a'n India squad-ah ram tana la inlan ngai lo player paruk a ko tel.

Rahul Bheke, Brandon Fernandes, Raynier Fernandes, Michael Soosairaj, Abdul Sahal leh India Under 17 World Cup team captain Amarjit Singh te chu ram tana an vawi khat inlanna tawng thei dinhmunah an ding mek. King's Cup-ah hian India leh Thailand bakah Curacao leh Vitenam an inlan dawn. Blue Tigers hian FIFA ranking-a 82-na ni mek Curacao hi June 5-ah an hmachhawn ang a, Thailand leh Vietnam an inkhel bawk ang. 

Inkhel pahniha chak zawk hian final lutin June 8-ah an inhmachhawn leh ang a, chak lo team pahnih hi June 8-ah vek pathumna inchuhin an inkhel dawn bawk. Croatia coach hlui Stimac chuan, "Thailand boruak hian inkhelh a ti harsa deuh mai thei. Season chawlh lai a nih avangin a harsa lehzual dawn a, mahse hei hi chhuanlama hmang thei kan ni lo. 

"Ram dang pawh season hmang zo vek tawh an ni a, kan khelhna sik leh sa hnuaiah tho an khel dawn. He hmunah hian hnehna chang turin kan kal a, kan theihtawp kan chhuah ang," a ti. Lunglei rawlthar Lianzuala bak Mizo zingah India squad-a tel an awm lo a, regular player Jeje Lalpekhlua chu a khup hliam zai a nih avangin a chawl rih a ni.

––––––––––––––––––––––––––––

Goalkeepers: Gurpreet Singh Sandhu, Amrinder Singh, Kamaljit Singh.

Defenders : Pritam Kotal, Rahul Bheke, Sandesh Jhingan, Adil Khan, Subhasish Bose.

Midfielders: Udanta Singh, Jackichand Singh, Brandon Fernandes, Anirudh Thapa, Raynier Fernandes, Pronay Halder, Vinit Rai, Sahal Abdul, Amarjit Singh, Lallianzuala Chhangte, Michael Soosairaj.

Forwards: Balwant Singh, Sunil Chhetri, Farukh Choudhary, Manvir Singh.