Tlai dar 3:00-ah Afghanistan Vs Sri Lanka

Afghanistan leh Sri Lanka te kumin Cricket World Cup an khelh hmasak berah an mualpho ve ve a, vawiin tlai dar 3:00-ah Asia ram pahnih hi Sophia Gardens, Cardiff-ah an inhmachhawn ang.

ODI bikah team pahnih hi vawi thum chiah an la inhmachhawn a, Sri Lanka hi vawi hnih chakin Afghanistan hi vawi khat an chak ve bawk. Afghanistan tan tun ṭum World Cup hi cricket inelna liana an vawi hnih inlanna chauh a ni a, champion lai Australia laka wicket sarih ngawta an tlawm pawh a hriatthiam theih. Sri Lanka erawh 1996 champion an ni a, New Zealand laka wicket 10 zeta an tlawm avangin an ram mipuiin an chak loh dan hi an pawm thiam lo ang.

Sri Lanka player zingah captain Dimuth Karunaratne chiah a che ṭha a, thi loin run 52 a siam. Team pumpuiin run an siam zat hi 136 a nih avangin batsman dang fak ngaihna a awm lo a, bowler tan tih theih a tlem tawh nachungin wicket khat pawh an lak loh avangin an che ṭha bik lo.

Hnehna chang turin Sri Lanka tan Angelo Mathews-a chet ṭhat a ṭul a, batsman theihna nei sang tak hian warm up match-ah half century a siam a, New Zealand laka 'duck out' player ang ngawta thlir chi a ni tawh lo ang. Afghanistan lamin all rounder ranking-a pathumna ni mek Mohammad Nabi an kawl a, ani pawh hi Australia nen chuan a che ṭha bik lo - run sarih chiah siamin wicket pawh a la lo.