Vawiinah India Vs England

Sardar Patel Stadium, Ahmedabad-ah vawiin chawhma dar 9:30 aṭangin India leh England ten Test match vawi li an khelh tura a tawpna ber an khel dawn. Virat Kohli hoten match hnuhnung pahniha hnehna an chan avangin 2-1 in hma an hruai mek a, series la turin draw a tawk.

Third Test-ah India spinner-te an langsar a, player of the match-a thlan Axar Patel leh Ravinchandran Ashwin te an che ṭha hle. Kum 27 mi Patel hian India tana Test match vawi hnih a khelhnaa hian wicket 11 zet a la, first innings (6/38) leh second innings (5/32) ah amah aia che ṭha an awm lo.

India ram a nih miau avangin spinner chhuanvawr Ravinchandran Ashwin a la rintlak zel. Tamil Nadu bowler Ashwin hi second Test-a khan player of the match ni thungin wicket riat a la a, thir Test-ah pawh wicket sarih a la tho bawk.

Chutihrualin cricket expert-ten inkhelhna pitch an sawisel nasa hle. Ahmedabad-a third Test kha ni hnih chhung lekin an khel zo a, pitch chhiat vanga chakah India an puh. 

Pitch sawiseltu zingah hian Michael Vaughan, Mark Waugh, Kevin Pietersen leh Yuvraj Singh te pawh an tel. Amaherawhchu West Indies legend Viv Richards chuan England chu chhuanlam siam kual loa Indian spinner-te hmachhawn thei tura inpeih turin a hrilh thung.