Chinese Super League Asian football league langsar hma hun a thim

Pathianni khan Chinese Super League champion Jiangsu FC chuan mipui thin ṭhawng dawt khawp thutlukna an siam - an club a tawp tawh dawn!

Aizawl FC-in I League nomawi an chawi aṭanga thla thum hnuah khan club a tawp tur thu puang ta se mak kan ti ngawt ang - chutiang chu tuna Jiangsu dinhmun hi a ni. 

Club neitu Suning chuan retail sumdawnna lama insawrbing tura an club hi titawp tur an nih thu an sawi a, Chinese football chauh ni loin football khawvel a barakhaih takzet. 

November 2020-a an league nomawi hmasa ber chawitu club thutlukna siam hian titi a ti tam a, European football hial nghawr nghing a, club liante meuh el ngamtu CSL kha a tlu ta mek - tu mawhphurh nge?

Mizo zingah pawh Jiangsu hria kan awm nualin a rinawm. He Chinese club hian kum 2017-18 inkar khan khawvel huap pawha coach langsar Fabio Capello chu an club enkawltu atan an lo ruai tawh. 

Kum 2019 khan Gareth Bale lakluh tumin thawm ring tak an lo nei tawh a, Real Madrid aṭanga Welsh forward lakluh an tum hian kar khata pound maktaduai khat hlawhtir an inhuam niin khawthlang media-te chuan an tarlang!

Chinese club hian Liverpool hel lai Alex Teixeira chu euro maktaduai 50 zetin an lo chan khalh tawh a, kum 2016 khan Chelsea midfielder ṭha Ramires an lo chhuhsak tawh bawk. 

Mizo pa compensation la ang maiin CSL club hian sum hman an thiam lo a, Covid-19 hri a len hnuah a sawh khawk tuar zo loin an tlu ta ni berin a lang. 

Jiangsu FC chuan an club tihtawp chhanah hian thuchhuah siamin, "Nomawi min chawipuitu player leh he club tana ding reng ṭhin fan-te nena inṭhen hi hrehawm kan ti takzet. 

"Mahse, he thuchhuah hi kan siam a ngai miau si. Vawiin aṭang chuan Jiangsu Football Club chu tihtawp a ni ta, " tiin hrehawm ti tak chunga an club an tihtawp thu an puang. 

February khan Suning chairman Zhang Jindong chuan, "Retail lama kan sumdawnnaah chauh rilru kan sawr bing tawh dawn a, he sumdawnna nena inkaihhnawihna nei lo thil chu kan titawp vek dawn a ni," tiin a lo sawi tawh. 

Suning hian nikum khan Premier League nen pawh buaina an lo nei tawh - an company hnuaia mi PPTV chuan kum 2019 khan English top flight football hi season thum chhung chhuah turin inremna an lo neihpui tawh a, mahse, pound maktaduai 564-a an inremna anga sum an pek zui theih loh avangin Premier League chuan an inremna a titawp a ni. 

Suning tihtawp chhan langsar tak pakhat chu Chinese Football Association (CFA) lamin club hminga company hming a beh tel rem a tih tak loh vang a ni - Jiangsu tan pawh 'Suning' tih hming put tel a rem ta lo a, Jiangsu FC chiah a ni tawh. 

CSL club dang Tianjin Teda pawh Tianjin Tigers tih a ni a, hei vang hian Teda chuan Tianjin club-a sum an thawh chu an titawp nghal niin khawthlang media-te chuan an tarlang. 

Hetiang boruak karah hian Covid-19 vangin club-te sum lakluh a hniam ta bawk si a, uchuak taka sum hmang ṭhang Chinese Super League club tam tak tan kal zui a harsa hle. 

February khan Chinese FA Cup champion Shandong Luneng chu player-te hlawh an pek theih loh avangin AFC Champions League aṭanga paih chhuah an ni a, coach atana Fabio Cannavaro meuh nei a, Alexandre Pato leh Axel Witsel lo kawl tawhtu Tianjin Tianhai chu nikum khan tihtawp a lo ni tawh a, nikum khan Liaoning F.C chu player hlawh an pek ṭhat loh avangin CFA chuan a lo hrem tawh bawk. 

Kum 10 vel liam ta khan China president Xi Jinping chuan football-a China hnufual reng chu thlak danglam a duh thu a sawi a, kum 2050-ah chuan khawvela football ram ṭha pawl nih a duh. 

China President thusawi hian an sumdawng lian tam tak a kai tho a, chin lem nei loin sum an hmang ta a ni ber. Mahse, hei hian an beisei angin Chinese football-ah rah ṭha a chhuah lo a, CFA chuan tun hnaiah khan dan thar a tichhuak. 

CFA hian season thar aṭanga hman ṭan turin player hlawh an bithliah tawh a, April aṭanga khelh ṭan tur league-ah hian ram pawn player-in kum khatah pound maktaduai 2.7 aia tam a hlawh thei tawh dawn lo - kum 2017-a Carlos Tevez-a'n  Shanghai Shenhua tana thla khata a hlawh nen a inang vel!

Chinese FA general secretary Louis Liu chuan, "Sum sen dan kha a uchuak mah mah a, kum 2019 khan player hlawhah dollar maktaduai 180 vel sen a ni a, chung zinga 70-80% chu ram pawn player-te hlawhah a kal," a ti a, CSL club-te sum sen uchuak tak chuan an ram football tan hmasawnna a ken tam loh thu a sawi. 

Chinese Super League-in chanchin duhawm lo an nei a, CSL club neitu ṭhenkhatin Europe-ah club an neih tel nual avangin European football-a nghing tel lo thei lo. 

Jiangsu neitu Suning hi Serie A hmahruaitu Inter Milan neitu an ni tel a, khawthlang media-ten an tarlan dan chuan Suning hian Italian club-ah pawh hian sum 'invest' theitu tur an zawng mek!

Premier League club zingah West Bromwich Albion neitu chu Chinese sumdawng hausa Lai Guochuan a ni a, Wolverhampton Wanderers neitu hi Chinese company Fosun International ta a ni a, Southampton-a 80% share neitu Gao Jisheng pawh Chinese sumdawng tho a ni. 

Manchester City-ah Chinese sumdawng ṭhenkhatin share nei ve mah se anni erawh hlauthawng tur an niin a lang lo a, Championship lamah pawh Birmingham City leh Reading chu China sumdawng inrawlhna a ni  - CSL nghawng hi a la ngaihnawm dawn chauh!