Villas-Boas thlaktu Sampaoli

Marseille chuan hun rei tak chhung an chawlh lailawk tir hnuah manager Andre Villas-Boas-a contract an titawp a, a hmunruak luah turin Jorge Sampaoli an lalut zui nghal bawk.

French Ligue 1 club Marseille hian khelmual pawn lamah buaina an nei. Club kalphungah fans an lawm lo, player lakluh danah coach Villas-Boas a lawm lo bawk - January 2 aṭang khan an manager hi an suspend tawh a ni.

January bazar tawp ni khan Marseille hian Celtic aṭangin Olivier Ntcham an lalut, an player lakluh chungchang hi Villas-Boas chuan a hriatpui loh thu ualau takin a sawi chhuak a, club kalphungah a lawm loh thu a sawi bawk.

Kum 43 mi Villas-Boas hian tun season tawp thleng daih contract a nei a, mahse a hmang zo dawn ta lo. Thawhlehni khan a contract hi tihtawp fel a nih thu an puang, season hmasa Ligue 1 lama pahnihna nihpuitu nen an thawhhona hi club chuan a titawp a ni.

Villas-Boas awm loh chhung khan manager lailawk Nasser Larguet chuan team a enkawl a, match sarih an khelh aṭangin vawi khat chauh chak loh an nei. Champion lai Paris St-Germain lakah 2-0 in an tlawm bak chu chak loh an nei lo.

Portuguese managar thlaktu tur Sampaoli hian tanwhriat a nei hnem tawh. Argentina leh Chile ram team a enkawl tawh a, tun hmain Spanish club Sevilla a lo kaihruai tawh bawk - Marseille tan hian kum 2023 thleng daih contract a ziak.