Juventus beiseina a la nung reng Zaninah Inter Milan inlan dawn

Italian champion Juventus chuan Spezia 3-0 a sawpin point thum an hlawh chhuak a, table-ah pathumna dinhmun an luah nghet. Old Lady hian hmahruaitu Inter Milan an phak lohna chu point sarih a ni, nomawi humhim an la tum hle.

Serie A hmahruaitu Inter chu zanin dar 1:15 hian an inlan dawn. Antonio Conte naute hian season hmasa ang khan pahnihna ni chunga hun tawp hman an tum tawh lo, champion an tum avangin team talbuai Parma lakah chak tura rinkai zawk an ni.

Thawhlehni zan Allianz Stadium a inkhelah Juventus tan harsatna a awm lo. Cristiano Ronaldo-a'n club hrang hrang tana league match 600 a khelh tlin zanah goal a khung a, a hma lamin Alvaro Morata leh Federico Chiesa ten an khung bawk.

Hun chanve hma lamin goal lut lo mah se second half-ah Juve an hlauhawm. Federico Bernardeschi-a cross chu Morata-a'n amah vengtu tlan khalhin hnai takah goal hmahruai a khung, goal hi a tirah offside nia ngaih ni mah se VAR hman a nih hnuah an pawmsak.

Minute 71-naah Federico Chiesa-a'n hnai zet aṭanga a shot chu khel ṭha tak keeper Ivan Provedel chuan lo dang mah se, ball per hi tluk pahin Chiesa bawkin a pet hram a, an goal hnih nan a lut. Hun tawp dawnah Ronaldo a inlar chhunzawm ve thung.

Counter attack aṭangin Old Lady-in na takin an nawr let, Juve player pathumin Spezia player pahnih chauh an hmachhawn hnuin Rodrigo Bentancur-a'n Ronaldo tan a siamsak - Portuguese forward hian tun season a league goal 20 nan a khung.

Kum 36 mi Ronaldo-a'n goal a khung hmangin goal ban a pet per a, a freekick chu ṭha takin an dansak bawk. A tawpah erawh dan reng theih a ni lo, tun hnai season 12 chhung chu league goal 20 a khung tling ziah! Europe league lian panga zingah hetiang ti thei hi midang an la awm lo.

Juventus hi an match hnuhnung zawkah Verona nen 1-1 in an inhnehtawk, an elpui Inter lakah point 10 zetin an hniam hman. Tunah erawh an inkar an tiziam leh ta deuh a, khelh hmabak match 14 ngawt a la awm avangin inelna a la tawp lo.

Spezia lakah hliam vangin Leonardo Bonucci, Giorgio Chiellini, Juan Cuadrado, Arthur leh Paulo Dybala te an inlan thei lo a, warm-up an neih laiin defender Matthijs de Ligt chuan hliam tenau neiin a inhnuhdawk a ngai hial bawk.

Player ṭha chhawr thei lo nual mah se Juventus tan harsatna a awm lo. An mamawh zat goal an khung bakah tlarhnung lam an inveng tluan thei bawk. Inrinni zana Lazio an hmachhawn hunah erawh Spezia hmachhawn ai chuan hna a hautak deuh ngei ang.

Bianconeri manager Andrea Pirlo chuan, "A tir lamah kan khel ṭha tawk lo, ni thum dana match neih zel chuan minute 90 chhung ṭha taka khelh reng a harsa ṭhin. Chutih rualin hun chanve hma lamah khan goal khung lo mah ila remchang kan insiam nual.

"Player ṭhenkhatin khelhna hun remchang an neih an chhawr ṭangkai nghal a, kum naupang leh tawnhriat nei tlem deuh zawkten senior player karah inrintawkna an neih kha kan chhawr ṭangkai," a ti. Dutch defender De Ligt chu a hliam nat loh hram a beisei thu a sawi bawk.