Bucks ngam loh Jokic awmna Nuggets
Nikola Jokic-a'n NBA regular season bika a vawi 50 nan triple-double a siam a, a team Denver Nuggets chu Milwaukee Bucks lakah 128-97 in a chak pui - tun hnaiah a zawnin match nga an chak ta.
Serbian tlangval hian point 37 a neih bakah assist vawi 11 neiin rebound vawi 10 a la bawk. Ani bakah hian Nuggets-in hnehna an chan theih nan point 24 neitu Jamal Murray a thawhhlawk hle bawk.
Bucks tan Giannis Antetokounmpo-a'n point 27 nei mah se chak pui nan a tawk zo lo. Greek tlangval hian thlawptu a nei ṭha tawk lo. Hnehna changtu Nuggets hi Western Conference-ah pasarihna an ni a, chak lo Bucks erawh Eastern Conference-ah pathumna an la ni thung.
Basketball inelna sang berah hian triple-double vawi 50 nei ting thei hi an la tam lo. Tun hmain - Oscar Robertson (181), Russell Westbrook (156), Magic Johnson (138), Jason Kidd (107), LeBron James (97), Wilt Chamberlain (78), Larry Bird (59) leh James Harden (53) te chuan hming an lo chher tawh.
Nimin zing inkhel dangah Los Angeles Lakers chu Phoenix Suns lakah 114-104 in an chak lo. NBA champion hian hliam vangin Anthony Davis an la chawr thei lo, ani bakah hian Marc Gasol (hrileng) leh Kyle Kuzma (keartui hliam) te an inlan thei lo chu an tuar.
Lakers thiampuipa LeBron James-a'n point 38 nei mah se chak pui nan a tawk zo lo. Regular season kal laiah Lakers hian beisei phak loin Western Conference-ah pathumna an ni mek, an chungah hian Phoenix Suns leh Utah Jazz an awm.
NBA Results
Denver Nuggets 128 - 97 Milwaukee Bucks
Memphis Grizzlies 125 - 111 Washington Wizards
Atlanta Hawks 94 - 80 Miami Heat
Boston Celtics 117 - 112 Los Angeles Clippers
Phoenix Suns 114 - 104 Los Angeles Lakers
San Antonio Spurs 119 - 93 New York Knicks