Wawrinka a tla nghal

Stan Wawrinka tan season duhawm a ni rih lo. Swiss star hian Thawhlehni zan khan Rotterdam ATP-ah a match hmasa ber a khel a, hneh nei loin a zing kawng a tawp zui nghal.

Grand Slam vawi thum champion tawh hian Australian Open hnua a match hmasa ber khelin, a khingpui Russian tlangval Karen Khachanov lakah 6-4, 7-5 in a chak lo a ni.

World number 21 Khachanov hi a service a ṭhain a ball vuak a na hle, seeded pariatna lakah hian a service bikah game a hloh miah lo hial a ni. A match lehpekah chuan Britain tlangval Cameron Norrie nen an inhmachhawn ang.

Inkhel dangah seeded palina Andrey Rublev chuan Marcos Giron 7-6 (1), 6-3 in a hneh a, a match dawt lehah world number 1 hlui Andy Murray nen an inkhel dawn - Murray hi hun rei tak a chawlh hnua lo kir leh tur a ni.