Lazio leh Torino an inkhel thei lo

Thawhlehni zan khan Lazio mualah Torino lenglut tur an ni a, mahse mikhual team lam hi an player pariat ngawtin coronavirus an kai tih hriat chhuah a ni a, an club awmna Turin khawpuia damdawi lam thiamte chuan zin chhuak lo turin an hiattir.

Kar hmasa khan Torino leh Sassuolo te inkhel tur chu hrileng vang hian a hun sawn a lo ngai tawh bawk. Lazio hian league thuneitute duhdan angin inkhel turin an player an chhawp chhuak, mahse an khingpui tur team erawh mel 430 vela hlaah an awm.

Serie A inkaihhruaina danah chuan inlan lo Torino hi 3-0 a chak loa puan tur an ni a, an point neih sa aṭangin point khat an paihsak bawk ang. He thu buatsaih lai hian an chungah engtin nge ro an rel dawn hriat a la ni lo.

Season tir lam khan Napoli chuan hrileng vangin Juventus an hmachhawn thei lo. Chak loa puan an nih bakah point a paihsak. Mahse, Napoli hi Italian Olympic Committee (CONI) hnenah an zualko a, point paihsak hi pek let an nih vakah Old Lady nen an inkhelh hun tur siamṭhat a ni.