March 5 aṭangin I League ṭan leh dawn

I League second phase fixtures tihchhuah a ni a, March 5 aṭangin Kolkata-ah khelh ṭan a ni leh dawn. Champion tur team paruk zingah Mizo club Aizawl FC an tel pha lo a; Churchill Brothers, Real Kashmir, Mohammedan SC, Gokulam Kerala, RoundGlass Punjab leh Trau ten champion tur an zawng ang.

Mizo club erawh Sudeva Delhi, Chennai City, Neroca leh Indian Arrows te nen group khatah an awm a, relegate tur an zawng thung dawn.

I League-ah hian first phase-a an result an ring chhunzawm dawn a, match hmasa 10-a point 22 hmu thei Churchill Brothers chu champion tura rinkai ber an ni ang. Second Phase-ah hian match nga khelh tur a awm dawn a, point 15 hmu tur a awm. Goan club hi point liin hma an hruai mek avangin nomawi chawi turin an dinhmun a ṭha.

Churchill hian 2008–09 leh 2012–13 khan I League-ah an champion tawh a, hun rei tak an champion loh hnuah nomawi chawi theihna hun ṭha a inher chhuak. Chutihrualin point li inthlauhna hi match hnih leka chinfel theih a ni a, pahnihna RoundGlass Punjab leh pathumna Real Kashmir tan pawh nomawi beiseina a la inhawng.

Second phase match hmasa berah Real Kashmir leh Churchill Brothers te inkhel result hian nghawng lian tak a nei ang. Kashmir hian Goan club hi point an chhuhsak thei lo a nih chuan champion a harsa tawh ang. Chutihrualin RoundGlass Punjab pawhin Gokulam Kerala laka point thum hmuh nghal chu an hna hmasa tur a ni.

Mohammedan SC leh Trau ten Championship stage an thleng hram a, an pahnih inkhela chak zawkin nomawi beiseina an nei chhunzawm dawn. Chutihrualin hmahruaitu Churchill Brothers hi point ruk tehmeuhin an pha lo a, an inkar a zau tawh hle.

Relegate tur zawnnah team panga Aizawl FC, Sudeva Delhi, Chennai City, Neroca leh Indian Arrows te awm bawk mah se relegate thei chu AFC, Chennai City leh Neroca te chiah an ni. Sudeva hi I League khel tura inlei tling an nih avangin an relegate thei lo a, Indian Arrows hi chu AIFF-in rawlthar ṭha rual a dah khawmna a nih avangin an tla thei lo bawk.

Aizawl FC an vanduai a, Championship Stage an thleng pha lo. Season ṭantirh lama champion inbeisei Mizo club tan nomawi beisei theih a ni lo a, tunah erawh relegate thei zingah awm mah se point 15 tehmeuh an hmuh tawh avangin an tlak a rinawm loh. Mizo club hi second phase round hmasa berah an awl nghal dawn a, club dang dinhmun an hriat theih phah ang.

March 11, Ningani tlaiah Aizawl FC-in Neroca an hmachhawn dawn a, Mizo club hian Manipur club hi an hneh a nih chuan match thum khelh hmabak awm chungin an him dawn a ni.