Sancho-a'n Dortmund a chakpui

Borussia Dortmund-in DFB Pokal semifinal lut turin Thawhlehni zan khan Borussia Monchengladbach 1-0 in an hneh a, goal awmchhun hi Jadon Sancho khung a ni.

Dortmund hian March 6, Inrinni zanah Der Klassiker (German Clasico) an khel leh nghal dawn a, Allianz Arena-ah Bayern Munich nen an inhmachhawn ang.

Borussia-Park-ah ṭan phat aṭangin inkhel a nung ṭha a, minute hnihna lekah Jonas Hofmann-a cross chu Gladbach forward Marcus Thuram-a'n hnai tak aṭangin goal zawnah a pet thei lo.

Dortmund pawhin first half-ah chance ṭha bik an nei a, Erling Haaland-a'n keeper Tobias Sippel chauh a hmachhawn chungin goal sirah a daih a pet.

France legend Lilian Thuram-a fapa Gladbach forward Thuram hian halftime hmain goal a khung a, offside vangin pawm a ni lo. Second half-ah Dortmund tana Haaland-a goal khung pawm a ni bik lo.

Norwegian striker Haaland hian Reus-a cross chu second half ṭantirhah a khung a, amaherawhchu Haaland hian goal khung hma hian Ramy Bensebaini a tihtluk avangin goal hi pawmsak a ni lo.

Minute 66-naah goal mawi hmuhin a awm. Counter attack hmangin Haaland leh Reus ten Glabach tlarhnung an ṭhiat a, English winger duhawm Sancho-a'n a tawp a khar a, goal ban fuhin a lut. Dortmund-in Haaland hmangin goal khung theihna hun ṭha dang an nei a, keeper Tobias Sippel-a'n a dang.

Injury time-ah Mahmoud Dahoud-a'n ṭul lo takin yellow card vawi hnihna a hmu a, Dortmund-in player 10-in an khelh phah.

Borussia Dortmund-in season hmang ṭha tawk lo mah se DFB Pokal chawi thei dinhmunah an ding. German Cup-ah hian champion lai leh team ṭha bera ngaih Bayern Munich an tla tawh a, Lucien Favre thlaktu manager Edin Terzic-a'n ama puala team a enkawl hmasak berah nomawi chawi theihna hun ṭha a nei ang.

Chutihrualin season tharah chuan Dortmund hi Gladbach manager Marco Rose a enkawl tawh dawn. Terzic hian DFB Pokal-ah hian amah thlaktu tur Rose-a hote a hneh tihna a ni.