Zarkawt BCA leh Khatla TBL dinhmun a ṭha

Mizoram Super League season 6 final khel turin Zarkawt BCA leh Khatla TBL dinhmun a ṭha ta, tualchhung basketball inelna sang bera champion tawh team pahnih hian final lut turin match khat chiah chak ngai tawh.

Thawhlehni zan khan semifinal game 1 khelh a ni a, champion lai BCA hian Tuikual South chu 87-73 in an hneh. Khatla TBL pawhin an khingpui Chanmari Vikings chu 87-65 in an hneh ve bawk - zaninah game 2 khelh a ni dawn.

Semifinal game 2 khelh hmain relegation playoff khelh a ni leh dawn. Match hmasa zawka hnehna changtu Chawnpui tan tlang turin Ramhlun Sporting Club hneh nawn a tawk ang. RSC an chak ve thung a nih chuan March 6, Inrinniah game 3 an khel chhunzawm ang.

League round lama chak kim thei awmchhun Zarkawt BCA tan hna harsa a awm lo. Most Valuable Player ni lai Lalrina Renthlei chuan point 20 bakah rebound vawi sarih a la. Tuikhuahtlang tlangval Lalrina bakah hian Zonunsanga (17 points) leh Lalsangkima (14) te an che ṭha.

MSL-ah hian a tira an squad thehluh pangngai kha hman tlang niin, state pawn player an ziah luh chu chah nawn theih a ni. BCA hian Showkin Shetty an chawr thei. Mangalore center hian point 16 a nei bawk, game 2-ah chuan an chhawr rim zual tura ngaih a ni.

Tuikual South kalphung a la danglam chuang lo. Tualchhung player an chhawr rim a, thawhhona ṭha chu an innghahna a ni leh bawk. An thiampuipa F. Zodinthara (19 points) bakah Lalrinfela Pachuau (14) leh Lalnunpuia Renthlei (14) te an hmuhnawm, Phengphehlep hian game 2 lak an tum ngam ang.

Mizoram Super League champion hmasa ber Khatla TBL danglamna chu hun tawp dawnah a lang. TBL leh Chanmari Vikings te quarter hmasa pathumah an inbei tawk hle; 56-50 in TBL lam an chungnung hret, chak tur a la chiang lo.

Quarter hnuhnung berah team ṭha zawk danglamna a lang. TBL lamin point 31 an neih belh bakah an basket an venghim ṭha - Vikings lamin point 15 chauh an neih belh thung. Team thar Chanmari lamah hun tawp hman ṭhat pawimawhna an zir chhuak ngei ang.

TBL dinhmun a ṭha tawh a, chutih rualin Vikings lamin point 10 chuang nei thei Zonunsanga (16 points), Lalhlunmawia (15) leh tawnhriat nei ṭha Michael F. Lalawmpuia (13) te an neih avangin beisei an la nei sang dawn - chak thei an la ni.

Chawnpui BC    78 - 76    Ramhlun SC(R)

Khatla TBL    87 - 65    Chanmari Vikings

Zarkawt BCA    87 - 73    Tuikual South

Ramhlun SC    01:30 PM    Chawnpui BC (R)

Tuikual South    04:00 PM    Zarkawt BCA

Chanmari Vikings    07:30 PM    Khatla TBL

Chawnpui BC    01:30 PM    Ramhlun SC (R)

Khatla TBL    04:00 PM    Chanmari Vikings

Zarkawt BCA    07:30 PM    Tuikual South