Top four inchuh boruak a 'hot': Liverpool vs Chelsea

Premier League-ah Manchester City kaltluan avangin champion inum boruak a thi tawh, tia sawi theih a ni a, mahse, 'top four' inum boruak a 'hot' chhoh avangin English top flight ngaihnawmna a bo lo. 

Champion lai Liverpool chuan zanin dar 1:45-ah Chelsea an mikhual dawn a, Reds hi table-ah parukna ni lai niin Chelsea hi pangana an ni thung - an inkarah point khat chiah a awm bawk!

Everton-in chanchin ngaihnawm ziah tumin season duhawm tak an hmang mek a, zanin dar 11:30 hian tlak hlau West Brom an lenchilh dawn - top four-a kai tum leh relegation zone tlanchhiatsan tum inkhel a ni dawn a, a hmuhnawm loh ring suh. 

Table-ah pariatna ni mah se Tottenham Hotspur-in palina West Ham an thlauhna chu point ruk chauh a ni a, match khatin an khel tlem bawk - zanin dar 11:30-ah relegation zone aṭanga talchhuah tum Fulham an lenchilh dawn a, a hmuhnawm ang. 

Liverpool fan-ten Chelsea an mikhual hmain chanchin lawmawm hriat tur an nei a, goalkeeper ṭha mi Alisson Becker, midfielder Fabinho leh forward Diogo Jota-ten club training an zawm leh tawh. 

Premier League champion hi season tluanin hliam vangin an talbuai dawn niin a lang a, tun season-a an buai chhan lian berah pawh 'inhliam' tih chu inthlahrung hauh loa sawi ngam a ni - tun season-a hliam vanga an player-te chawlh zat belhkhawm chu ni 1029 a tling hial!

Hetiang boruak karah danglamna thlen thei ṭhiau player-in training an zawm leh thu hriat hi Reds ṭantute tan chuan a lawmawm ang tih a chiang a, Fabinho hi tlarhnung laia Nathaniel Phillips emaw Ozan Kabak kawp tura bul ṭan tura beisei a ni. 

Tlarhmaah Jota-a'n bul a ṭan la rinawm chiah lo mah se Mohamed Salah, Roberto Firmino leh Sadio Mane-ten thachhang dawl tura rintlak an nei leh ta hi an thla a muan phah sawtin a rinawm a, Chelsea tan rimawi a ni lo tawp ang.

Chelsea hi Frank Lampard an ban hnuah nasa takin an insiamṭha a, coach thar Thomas Tuchel enkawlna hnuaia match kua an khelh tawhah tlawm an la nei lo - vawi ruk an chak a, vawi thum an khingpui an inhnehtawk pui. 

Tuchel hnuaia an match kuaah hian Blues-in goal hnih chiah an chhuah a, Lampard-a hnuaia an match hnuhnung pakuaah khan goal 12 an chhuah thung - tun hnaia goal khung harsat Liverpool tan Blues lakah goal khung a harsa dawn tih a lang.

Liverpool-in Anfield-a league match 68 zet tlawm an neih loh hnuah Anfield chu hmun zuamawm takah an chhuah mek a, league match ruk zet chu Anfield-ah an chak zo tawh lo - Chelsea an mikhual zui dawn avangin an record duhawm lo hi thaichhiat a harsa dawn.

Chelsea tan Thiago Silva leh Callum Hudson-Odoi dinhmun a la chiang lo tih loh chu he thu buatsaih thleng hian inlan thei lo tura sawi dang a la awm lo a, Tuchel-a'n duhthala player thlang chungin Liverpool a hmachhawn thei dawn tihna a ni. 

German coach pahnih Tuchel leh Klopp-ten inanna pakhat an nei - Mainz 05 aṭangin first team enkawl hna an thawk ṭan ve ve a, Borussia Dortmund an enkawl zui ve ve bawk. Hei vang hian khaikhin an hlawh nasa a, Tuchel erawh engtiklai mahin Klopp-a chungah dah a ni ngai lo. 

Germany legend pakhat, a hming tarlan loh chuan, "Tuchel-a'n Dortmund-a buaina lian tak a tawh chu Klopp-a ni tlat lo kha a ni," tiin a sawi a, he buaina hian Mainz leh Paris Saint-Germain thleng khan a zui niin a sawi. 

Mainz technical director Christian Heidel chuan, "Bundesliga aṭanga kan relegate khan Klopp hian, 'Kan kir leh ang, rinhlelh tur a awm lo,' tiin a sawi a, chu chu fan-ten champion ang maiin an lawm a ni," a ti!

Mainz leh Dortmund-ah pathian ang maiin Klopp chu en a ni a, Tuchel erawh 'Klopp an tum' ang leka en a ni - zaninah a chunga leng reng coach hi Tuchel-a'n a hmachhawn dawn a, Anfield-ah ngei hneh a, amah sawiseltute ngawihtir a duh ang. 

Everton-in coach ropui Carlo Ancelotti an neih miau avangin rin loh ngawt an harsa a, Italian coach hoin Champions League khelh ngei tumin an sang mar mek. 

Liverpool hliahkhuhna hnuaia an hun tam zawk hmangtu club hian match khata khel tlem chungin Liverpool point hmuh zat an hmu mek a, Anfield club tlansana Champions League khelh hi an duhthusam a ni ang. 

Zanin dar 11:30-a inkhel tur dangah Gareth Bale chu ngaihven hlawh a ni dawn - Spurs forward hian a reh vang vang hnuah tun hnaiah a theihna a pholang a, 4-0 ngawta Burnley an sawpna inkhelah goal hnih a khung. 

Spurs hian league match ruka vawi khat chiah hnehna an chan hnuin Burnley hi an hneh a, an phur thar leh ang tih a chiang - zaninah an chak zo lo a nih erawh chuan top four beisei a harsa tawh dawn.