FA Cup fifth round City leh Spurs an inlan dawn

League Cup champion hlim Manchester City-in zanin dar 1:15-ah FA Cup an khel dawn a, Championship club Sheffield Wednesday chu khualmualah an lenchilh ang. 

Premier League-a chak lo hlim Tottenham Hotspur pawhin an fan-te rilru thawi dam nan FA Cup lamah tal result ṭha neih an mamawh a, top flight football-a an elpui Norwich City chu zanin dar 1:15-ah an mikhual dawn. Celtic-a nomawi chawi theih ang zawng zawng chawitu Brendan Rodgers-a'n Leicester City-ah kut ruaka hun hman a duh lo. Zanin dar 1:15-ah vek Birmingham an mikhual dawn a, final mitthlatu team tan last 16 paltlang phawt a ngai. 

Manchester City hian Pathianni zan khan Aston Villa chu League Cup final-ah hnehin an champion a, FA Cup lamin an rilru a luah leh tawh ang. 

Hriat tel tur erawh Premier League-ah Liverpool chu champion chiang anga sawi theih an ni a, season hmasa angin City tan domestic treble beisei chi a ni tawh lo. Aston Villa laka a hliam avangin Sergio Aguero chu Pep-a'n a 'risk' duh a rinawm loh a, Real Madrid laka inhliam Aymeric Laporte chu thla khat tal a chawlh a ngai dawn bawk. 

City elite development squad tan Leroy Sane a inkhel leh tawh a, mahse German winger tan Sheffield laka lo kir chu a hma mah mah mai thei - City hi chak tur chianga dah an ni a, Sheffield tan hnehna chang turin thilmak a thlen a ṭul ang. 

Inelna hrang hranga an match hnuhnung pathumah Tottenham Hotspur an tlawm vek a, London club hi an dinhmun a chhe hle - season thara Champions League khelh phak an beiseina pawh a te sawt hle. 

Tun hnaia Mourinho-a 'Spurs' hi Mauricio Pochettino an ban dawna an dinhmun nen khaikhin hial a ni a, Chelsea boss hlui Mou hian an ṭhat dan ber tur ngaihtuahin player a siksawi nasa hle - hei hian sawisel a hlawh. 

Spurs hian a bik takin tlarhnungah player an siksawi nasa a, Toby Alderweireld hian Japhet Tanganga, Jan Vertonghen leh Davinson Sanchez te a kawp chhawk reng a, match hnuhnung berah erawh Toby ber hi a khel lo. 

Mourinho-a'n an ṭhat dan ber a la zawng reng tih a lang a, Portuguese coach hian a chinfel dan a ngaihtuah vat loh chuan Spurs hi a hming chher lehna hmun ni loin a thamralna hmun a ni thei. 

Spurs hian 2007-08 a League Cup nomawi an chawi bak champion an nei leh tawh lo a, club-a kalna apianga nomawi chawi ṭhin Mourinho hian nomawi chawi ngei a duh dawn. 

Mahse, Spurs tan season hmasaa final an luhna Champions League beisei a harsa a, Premier League-ah top four chu an beisei san theih ber a ni. FA Cup hi Mourinho tana nomawi awmchhun niin a lang a, zaninah an 

ṭhat dan bera player a rem a nih pawhin a mak lo ang. Hriat tel tur erawh Spurs hian striker rinrawl Harry Kane leh Son Heung-min chu hliam vangin an chhawr thei lo mek a, Dele Alli, Lucas Moura leh Steven Bergwijn te striker anga chhawr an ngai ṭhin. 

Leicester City-in inelna hrang hranga an match hnuhnung pangaah hnehna an chang zo lo a, Brendan Rodgers tan lu hai thlak tak a ni - zaninah Jamie Vardy a la chhawr thei dawn lo zui. Birmingham hmaa an match hnuhnung berah pawh Vardy hi a chawn hliam a lanchhuah leh avangin a inlan thei lo a, Rodgers chuan a striker chhuanvawr hi zaninah a inlan theih loh tur thu a sawi chiang.

Foxes tan Kelechi Iheanacho chuan tlarhmaah a hmun ngai a luah leh dawn tihna a ni a, kum 23 mi striker hian tun season-a match 14-a khelh tawhah goal riat a khung theih avangin Championship club lakah a zam lo ang. 

Birmingham hian Josh McEachran, Jeremie Bela leh Jacques Maghoma an chhawr thei dawn bik lo a, Blues tan hna a awlsam dawn lo.