Man City an sang tual tual

Manchester City chuan Premier League hmahruaina belchhhah turin Thawhlehni zan khan Wolverhampton Wanderers 4-1 in an sawp. Pep Guardiola hote hi match 21 chhung a zawnin an chak tawh a, league-ah pawh point 65 hmuin anmahni hnaih bertu Manchester United aiin point 15-in an hmu tam zawk.

Etihad Stadium-a inkhelah Wolves defender Leander Dendoncker-a'n an lamah a ti lut a, half time-ah Man City-in 1-0 in hma an hruai. Second half-ah Conor Coady hmangin Wolves-in siphurh an sut a, Man City talbuai hman mah se Gabriel Jesus goal hnih leh Riyad Mahrez goal khat hmangin chiang takin an chak.

Man City-in ṭan phat aṭangin an thiam zawk tih an lantir a, Wolves tlarhnung an buai hle. Minute 15-naah Riyad Mahrez-a'n ṭha taka ball a lak thlak hnuin a cross ṭha zet chu Dendoncker-a'n an lamah tlawh lut. Wolves defender hi dem theih a ni lo, khawih lo pawh ni se Raheem Sterling-a'n goal-ah a chantir dawn tho.

Pep Guardiola hoten goal chance insiam hnem mah se goal hmaah an vannei tawk lo a, first half tawp hmaa Aymeric Laporte-a goal khung chu offside vangin pawm a ni lo. Wolves keeper Rui Patricio-a'n ṭha takin Bernardo Silva goal khung tur a dansak bawk.

Second half-ah pawh chanchin a ngai a, Man City bawk goal hmaah an hlauhawm. Amaherawhchu minute 61-naah Conor Coady-a'n freekick aṭanga ball kal chu a tauh lut a, 1-1 a ni. Inkhelh kal hmang a dang ta daih a, Pep-a hote inkhel thunun chungin point hloh thei dinhmunah an ding.

Wolves an ṭang tluan thei lo a, minute 80-naah Gabriel Jesus-a'n box chhungah ball per chang fuhin chiang zetin a pet goal. Wolves tlarhnung tihsual zarah Mahrez-a'n minute 90-naah Man City goal thumna a khung a, injury time-ah Jesus-a'n a khung belh. Brazlian forward goal khung hi pawmsak ni lo zet mah se VAR hmanga ennawn a nih hnuah pawmsak a ni.

Manchester City manager Pep Guardiola chuan, "England-ah chuan thlasik laia result ṭha neih a har a, hun harsaah result ṭha chungchuang kan nei a ni. Ka player-te an khelh danah ka chhuang mah se Liverpool-in nomawi an kawl. Premier League nomawi chawi tur chuan point neih a ṭul a, chuvangin hnehna chan hi a hlu," tiin point thum an hlawhchhuah avanga a lawm thu a sawi.

Derby match thlir lawkin Guardiola chuan, "Manchester derby hmain ni hnih khat chawlhna hun kan nei a, United laka kal fal lehzual theihna hun ṭha kan neih dawn avangin bawhpelh loh a pawimawh a ang," tiin point thum hlawhchhuah ngei an tum thu a sawi.

Manchester United hian nizan khan Crystal Palace an hmachhawn dawn a, Pathianni zan dar 10:00 hian Etihad Stadium-ah Manchester City nen inkhel pawimawh bikah an inhmachhawn ang.